【個個都結晒婚！】鄭秀文晒華星年代舊照：青春小鳥一去不回來
每張相都有唔同嘅故事，每次睇相都會勾起唔少回憶添！近日，鄭秀文（Sammi）就喺社交平台分享一張華星年代嘅舊照，相中6人除咗Sammi之外，仲有張崇基、張崇德、李玟、車婉婉同梁漢文。當年只得20幾歲嘅佢哋，依家全部都結晒婚，一齊睇下佢哋各自嘅愛情故事啦！
撰文：Kammy｜圖片來源：Instagram，新傳媒集團資料庫，MV截圖
鄭秀文晒華星年代舊照
近日鄭秀文晒返張陳年舊相，張相已經係20幾年前、隸屬華星唱片時候所影。Sammi表示，張相其實係車婉婉Send畀佢，相中包括Sammi、張崇基、張崇德、李玟、車婉婉同梁漢文，Sammi仲不禁慨嘆：「我的青春小鳥小一去不回來….. 🤣別滴哪哎喲! 別滴哪哎喲!我的青春小鳥一去不回來 …… #成長 #少女變人妻 #不求青春不老但求活得有腦」當時佢吔6人仲好青澀，依家個個都成為人妻人夫，真係時光飛逝呀！
有網民推算，呢張相應該係1993年華星唱片推出《火熱動感93勁秋版》時所影嘅，仲話一見到就諗起Sammi所唱嘅《愛情傻戀La La La》添！不少網民都大讚，佢哋6人個樣多年來都冇變化，依家仲有入成熟嘅味道！
俾我搵到當年隨碟附送嘅印水紙喇，係我自己嚟㗎🤣🤣🤣 #愛情傻戀lalala #張崇德博士
A post shared by Peter Cheung 張崇德 (@dr_peter_cheung) on Feb 14, 2019 at 4:11am PST
各自建立幸福家庭
1.鄭秀文：與許志安 離合20載
現年46歲嘅Sammi同許志安喺1991年開始拍拖，二十年來多次離合，但最終都喺2013年結為夫婦，佢哋嘅故事用20年去印證一番話：「係你嘅，始終都係你嘅！」
1989年，Sammi參加新秀比賽得獎後加盟華星唱片，同師兄許志安一見如故。隨後兩人喺1991年以情侶姿態合唱《其實你心裡有沒有我》，冇幾耐就開始拍拖啦！
經典「廚房宣言」
最令人印象深刻，點可以唔提安仔嘅「廚房宣言」！許志安同鄭秀文於2001年，同時獲得「十大勁歌金曲頒獎典禮」最佳男女歌手獎。許志安上台從梅豔芳手中接過獎盃，然後發表咗怠動台下所有人嘅「廚房宣言」！雖然安仔當時冇提係同邊個講，但大家都心裡有數，台下所有人起身為呢對戀人鼓掌，而Sammi亦已經泣不成聲！
安仔：有一個人我要多謝，幾年前和她在廚房裡，我跟她說：有一日你拿最受歡迎女歌星，我拿男歌手獎就好囉！她跟我說要用心去做，只要相信自己就行了，想不到今日……多謝你！
不過，呢對情侶終喺2004年分手，多年來一直傳出復合嘅消息，但雙方都一一否認。
2011年3月，許志安喺情人節當天送咗999朵玫瑰給Sammi。後來，Sammi便發表復合聲明。聲明中提到：「我並非要成就什麼驚天動地的愛情，我只想踏實地經營一段平凡人的情感。我坦承跟安仔重新開始。結果如何？我不能預計。分開多年，要彼此適應各自的改變……」
2013年，許志安喺鄭秀文生日派對上求婚成功，並於11月底兩人跟雙方家人到巴厘島旅行慶祝。當時，抱得美人歸嘅許志安興奮得向好友公告：「決定攜手共度餘生！」
至於二人會否生小朋友呢？原來安仔曾經接受訪問時答到：「害怕社會壓力，所以不想生孩子。我不忍心在孩子手抱的階段已經要為他拍學生照，找學校。這件事我們二人已有共識。」而鄭秀文都有接受訪問時談到，呢個社會太亂了，將小朋友生落嚟，未必懂教他。
2.車婉婉：曾被批孤獨終老終破迷信成幸福媽媽
現年44歲嘅車婉婉原本係個全職歌手，曾參與電視喜劇《皆大歡喜》飾演萬貴妃一角而為人熟識。 早年，車婉婉喺是圈內有名嘅神婆，唔只迷信玄學，仲鐘意研究星座，而且仲試過喺電台到主持星座節目。
不過，車婉婉曾經喺一個基督教音樂會內分享，自己曾被相士批命冇可能結婚生仔，令佢一度對組織家庭失去希望，但後來自己因信仰而改變，令佢戒走多年煙癮，仲透露「戒煙第七天就遇上我老公」。車婉婉當年就經朋友介紹，認識細自己5年嘅中澳混血、游泳教練JonathonQuinlan，二人拍拖3年後於泰國結婚。
雖然車婉婉曾經被批不配有幸福，但好彩佢當初有相信自己，如今幸福滿載真係值得慶賀！
3.梁漢文：「浪子回頭」變暖男與妻戰勝病魔
現年47歲嘅梁漢文（Edmond）同林文慧（Karen）1992年喺朋友聚會識，雖然二人幾年冇聯絡，但98年喺Disco飲嘢撞返，仲開始拍拖，十年後仲結婚添！早前梁漢文更上載同太太嘅合照，慶祝拍拖21週年，真係好sweet呀！
上年梁漢文同老婆結婚10周年時，梁漢文都喺Instagram上載相片，「最近睇返幅相先留意到，原來同佢認識嘅第一日喺92年4月6號，哈哈！嗰日有朋友幫我地影低咗呢一張兒時合照😂，都幾有記念性🥂」
無論疾病或健康 默默守在老婆身邊
西方基督教結婚誓詞中通常會問一句：「無論是疾病或健康、貧窮或富裕、美貌或失色、順利或失意，你都願意愛他、安慰他、尊敬他、保護他？」，當新人答完「我願意」後，二人就對彼此許了一個一生的承諾。08年結婚嘅梁漢文 ，成為丈夫三年後，真正感受到呢個承諾嘅重量，事關太太林文慧喺2011年確診乳癌，愛老婆勝於一切嘅Edmond 面對如此命運，並冇埋怨同氣餒，反而默默留喺老婆身邊，唔畀惡病帶走佢嘅「半邊生命」。
發誓一世也照料你，又哪及張開手臂做你我的窩，抱恙時讓我去抱著你，我倆個變了一個早不必說什麼。（梁漢文《半邊生命》）
男兒淚的背後– 最沉重的秘密
乳癌呢個病，除咗不斷折磨林文慧嘅身心外，更考驗Edmond對妻子嘅愛。得知妻子患癌後，佢尊重愛妻保守秘密，將心如刀割嘅痛埋喺心底裡。當時Edmond 忙於工作，妻子患病嘅消息對佢打擊好大，加上每日通宵達旦地開工，壓力終於爆煲，喺後台喊。
一人生病 二人同甘共苦
喺後台喊完之後， Edmond先同好友張衛健、許志安同謝霆鋒等講出太太嘅病情，眾人隨即忙為佢哋介紹名醫，用中西合壁方法醫治，太太喺老公同身邊人支持下，決定接受化療醫治癌症。
病令人變得虛弱 愛使人變得偉大
Karen隨後受到化療副作用嘅影響而眉髮脫落，更因體重大減而變得瘦骨嶙峋。外出會戴假髮、化濃妝來遮掩病容。雖然唔使切除乳房性徵，但對Karen嚟講，係佢呢輩子最唔想遇上嘅事之一。面對命運， 梁漢文只好用「陪伴」嚟給予Karen同癌魔戰鬥嘅力量。
當時正值忙於準備演唱會嘅梁漢文 ，為怕消息曝光令妻子承擔壓力，佢選擇每日朝早陪老婆做化療同電療，出門喬裝，睇最早嘅醫生嚟避免有人認得佢哋。妻子患病期間，Edmond受到好友蘇永康嘅介紹，加入了任賢齊嘅公司，不斷上大陸接酒吧騷賺錢，希望能夠畀太太一個最好嘅療程，一同渡過難關。
戰勝癌魔 感情昇華
太太最終戰勝癌魔，Edmond對珍惜眼前人有深切體會，以前要型死都唔肯開口講我愛你或其他肉麻說話嘅佢，依家怕肉麻，愛要宣之於口。「當你曾經好驚失去對方，更肉麻嘅嘢你都會講。以前老婆成日好想我表達，我硬係唔講呀，因為覺得兩公婆使乜講咁多呀，用把口講不如用行動表達出嚟。
男人同女人嘅分別就一個唔鍾意講，另一個就好鍾意聽，男人往往認為呢啲說話下下都講出口就好唔型。依家我唔同晒，表達多咗，講幾個字令老婆開心點解唔做啫，佢開心對身體都好啲，總之佢叫我講乜都得！」Edmond面上的笑容，比起拿甚麼金曲獎、大碟獎更燦爛。依家Edmond除咗成為公認嘅暖男之外，仲將以往嘅壞習慣通通戒掉，不但戒煙，仲鮮少外出玩樂，更曾以「浪子回頭」自嘲。
首次對老婆說 我愛你
以往不懂浪漫嘅梁漢文 ，因為覺得尷尬，所以唔會將「我愛你」掛在口中，太太抗癌後佢第一次主動對妻子說「我愛你」，對方感動得抱緊佢喊，亦令佢自己感動。梁漢文明白，要保持愛情嘅熱度，首先要保持自己嘅熱情，先踏出自己嘅一步，為對方做一點事，而如果對方感受到，都會為你付出更多。一段真摰愛情背後嘅公式，其實就只係一條簡單嘅加減數學題。
4.李玟：華人天后 舉行世紀婚禮
現年44歲嘅李玟（CoCo），2011年同加拿大籍利豐總裁BruceRockowitz結束8年愛情長跑，正式成為人妻！雖然CoCo本身單親家庭出身，而老公亦係有住兩個女嘅失婚富豪，但依然無阻二人發展。
當晚Coco更喺香港最高嘅大樓天際100舉行一連兩日舉行被譽為開埠以來最豪嘅「億元婚禮」，當日更邀得著名歌手Bruno Mars、Alicia Keys等作嘉賓，當晚Bruce更表示會一世愛太太，二人十分幸福！
5.張崇德：與太太劉美娟走出喪子之痛
47歲嘅張崇德同太太劉美娟由拍拖到結婚相愛17年，雖然間中有意見不合嘅情況出現，但兩人從未吵架。二人曾喺節目中透露，當遇上「對的人」，腦裡便會好快出現想同對方廝守終身嘅念頭。原來張崇德同劉美娟拍拖嘅第二日，已經有求婚嘅衝動，而劉美娟都有呢個想法，好快佢哋就決定結婚！
「兩夫妻之間冇秘密！」係張崇德同劉美娟恩愛多年嘅秘訣。銀行戶口及手機密碼均向另一半坦然公開，遇到意見不合時，只會認真討論，絕對不吵架，就係咁相依相伴十幾年。
張崇德劉美娟：為死去的兒子領取出世紙 過程好難受
張崇德劉美娟大仔張天藍於2005年出生一天後夭折，至今已經14年。兩人曾為兒子之死，與醫務委員會「交戰」九年尋求真相，最終醫委會判定負責接生嘅醫生蔡明欣專業失德罪成而被停牌24個月。二人曾喺節目中提到呢件「往事」，兩人仍然心情激動。「要幫天藍搵一個墓碑，搵地方擺放骨灰，原來需要一張出世紙。我相信沒有人明白，要為一個已經離開的兒子，領取出世紙的心情。原來我能夠幫個仔做嘅事係得咁少，雖然個過程好難受，但我覺得呢件係唯一能為個仔做嘅事。」
大仔生忌 張崇德帶子女拜祭
去年二月，張崇德喺微博上載了兩張相，一張係囡囡日晴同囝囝日希喺大仔天藍嘅靈位嘅相，另一張係張崇德、太太同2個小朋友喺天藍靈位前合照。張崇德留言表示影咗第一張全家福，心情很激動，並留言表示：「早幾天是二兒子日希11歲的生日，今天則是大兒子13歲的生日……和太太首次帶日希和日晴去探哥哥，拍了首張5人全家福，心情很激動！」而劉美娟也留言：「盡在不言中」。
細女懂事：大哥上了天堂
隨著日希同日晴愈嚟愈懂事，佢哋知道對上仲有個哥哥天藍，美娟同崇德對佢哋從來冇隱瞞，早於幾年前已一一告之，起初美娟以為仔女仲細，未懂得事實嘅全部，原來佢哋早已記喺心入面。「呢件事好難掩飾，幾年前新聞日日都講，我哋又成日一早出去醫委會同上庭，所以我一定要畀仔女知。初初我都以為佢哋細個唔識，點知有次我同個女講要錫哥哥，因為你得一個哥哥要珍惜，佢竟然話:『媽咪，我有兩個哥哥，一個去咗天堂嘛。』」
一家人＝四為一體
在漫長嘅追討過程當中，佢哋從來冇忽略日希同日晴，返到家中就會對佢哋一心一意，畀佢哋一個快樂嘅家。隨著案件告一段落，一家人嘅感情愈嚟愈深厚，美娟更形容佢哋已是四為一體，每日一齊祈禱。「生命唔係你講，今日唔知聽日事，過到今日已經要感恩，我哋要活在當下，開開心心過每一天。」
6.張崇基：培養囝囝音樂天分
現年49歲嘅張崇基同圈外女朋友Mabel於2002年結婚，二人婚後一直享受二人世界。直到2012年，當時43歲嘅張崇基榮升爸爸，誕下囝囝張朗翹（Kristopher）。
當時張崇基曾表示，從未諗過要有小朋友，因為細佬（張崇德）第一個仔夭折，令到全家人都好傷心，直言對此有陰影。
後來，張崇德勇敢地誕下一對仔女，令張崇基都對此有信心，亦覺得係時候生小朋友，所以就生咗得意囝囝Kristopher，仲培育囝囝喺音樂方面發展！