網上熱話｜港男光顧酒樓晚市「包場」嘆經濟差 網民反駁：中式酒樓已過時
本地餐飲業近年受經濟下行、北上消費等多重因素夾擊，多間中式酒樓接連結業。最近有網民指光顧晚市酒樓時如「包場」，全場幾乎清一色空檯，場面冷清，網民熱議原因，稱「咁多人失業，邊有幾多人會有錢入酒樓消費」，亦有人反駁「你唔去商場影吓啲排晒隊嘅食店？中式酒樓已過時，關乜嘢經濟差事」、「而家唔興去酒樓食野，大把野揀，日本菜，泰國菜等」、「兩餸飯才是打死酒樓真正原因」，更有人預測「三年後冇晒酒樓！只有點心舖。」
有網民周三於facebook群組「香港茶餐廳及美食關注組」發帖，分享自己晚市光顧一酒樓的情況：「間酒樓我諗唔會太長命，呢一幕真係反映曬香港嘅經濟，大家留意時間係七點半晚上，不勝唏噓」，現場片段可見樓主與兩名疑似家人分別點了數款小菜，但全場幾乎清一色空檯如包場，魚缸內海鮮無人問津，酒樓似乎有樓主一枱客人，他慨嘆地說：「唉！現今經濟…所以明白點解咁多執笠啦！」
帖文引起大批網民熱烈討論，有人表示驚訝，直言「邊度地方？」、「哇！包場」，有眼利網民估計地點位於元朗，「元朗正常都留錢上大陸食，咁方便」、「宜家元朗都就係咁嘅情況，搭車上大陸越方便嘅地方死得愈快」。
網民預測「三年後冇晒酒樓」
有網民分析酒樓晚市冷清原因，「失業人數上升，真實數字仲高得多，冇工做點會出去消費？」、「咁多人失業，邊有幾多人會有錢入酒樓消費呀，由其平日夜晚個個都兩餸飯」。另一方面，租金高企是因素，「租金貴賣嘅野自然就會貴，香港人自然返深圳國內追求性價比」，加上人口老化、移民潮與生活壓力，令酒樓變「夕陽行業」，更有人預測「三年後冇晒酒樓！只有點心舖。」
消費模式改變 「年輕人唔去酒樓食晚飯」
不過，亦有網民認為問題不單出於經濟，而是消費模式改變，「邊度仲有人去酒樓食晚飯㗎，除非係老人家，年輕一輩都去食放題之類啦」、「酒樓係老屎忽文化，80、90、00後呢三個世代人都唔多去酒樓」、「疫情令香港人習慣早回家」、「兩餸飯才是打死酒樓真正原因」、「我排壽司郎排兩個幾鐘喎」、「講真個句炒碟菜都百幾蚊，又唔係特別過人，為乜要去酒樓食先」、「冇錢嘅唔出街食， 搵啖飯食嘅就食兩餸飯，有多餘錢嘅又返咗大陸食」。傳統酒樓服務也成為批評原因，許多人提到員工的態度及服務質素不佳，「個個員工都叫你買月餅，熟客都唔敢入去」、「9點半開始執枱趕客，10點已經清晒場等收工」。
亦有聲音指出不能單靠一間酒樓作「指標」，「有食肆拍烏蠅，有食肆排長龍」、「睇下你間酒樓係邊區啦！我屋企樓下嗰兩間星期一去食完坐咗九成半」、「你唔去商場影吓啲排晒隊嘅食店？中式酒樓已過時，關乜嘢經濟差事」。
睇完新聞，記得追蹤am730以下平台，接收最新、最啱你嘅消息！
Facebook：am730 (https://www.facebook.com/am730hk)
Instagram：am730hk (https://www.instagram.com/am730hk/)
YouTube：am730 (https://www.youtube.com/c/am730video)