《美麗40路》昨首播　44歲翁貝怡成「逆齡天花板」

ViuTV全新選美真人騷《美麗40路》昨晚（9月2日）首播，由孫慧雪、黃心美（Scarlett）、劉明軒（Vivian）和陳俞希（Hailey）主持，讓一眾35歲至50歲女性一展魅力。

經過短短一個月招募，《美麗40路》節目組收到超過1000份報名表，當中有前亞視一姐薛影儀、曾做過嫩模的馮鎵瀠（Naomi）等風雲人物，最終邀請100位高質淑女進行海選面試，包括前演員蔡潔雯、「搏擊女神」林慧倩、林奕匡太太李靄璣（Rikko）等。

相隔六年，回歸ViuTV的Scarlett笑言收到監製來電時，一度以為是被邀請參賽，而非擔任主持。阿雪則表示自己首次亮相ViuTV，亦是真人騷處女作，所以心情既緊張又興奮。海選時吳保錡在後台與阿雪相遇，更興奮地與女神打卡合照。

評判團方面則請來著名化妝師暨大會形象總監Annie G. Chan、大會髮型總監Chris Cheng、人像及時尚攝影師情Sir、星級模特兒余曉彤（Hidy），以及9位新晉男藝人，包括：KC黃家灝、Tsoul田曜誠、温湯馬仕（Thomas）、陳樂庭、王峰、Stick林昆樂、Hei羅子熙、Taco黃泓祖、Meow劉瑞威擔任。

40位脫穎而出的參賽者在首輪比賽以5人一組出場，表現最好的20位可晉級。評判情Sir特別鍾情10號從事診所姑娘的參賽者彭方廷Kiko，海選時情Sir已經讚Kiko上鏡靚過真人，而且還不停問她：「結咗婚未？住喺邊？邊間診所做？」連Annie G.也大爆情Sir「坐隔離咁耐，講咗10次彭姑娘」。

輪到第三組參賽者出場時，各評判需要競猜哪一位參賽者年紀最大，當揭曉結果是44歲的14號翁貝怡（Florrie）時，全場嘩然。當中只有Thomas猜中，被Tsoul大大質疑一早知道答案。評判Annie G.忍不住要求Florrie到她面前近距離觀看，還問她是否做了很多醫學美容。不過Florrie卻聲稱沒有，更指：「連facial都冇乜點做。」而且當大家知道Florrie還有兩個女兒時，樂庭隨意問一句：「有冇我咁大呀？」怎知卻換來23和21兩個數目字，樂庭驚訝到「擘大個口得個窿」，Meow更和樂庭說：「大個你呀已經，叫聲媽咪先啦！」Stick還即時問Florrie：「今日囡囡有冇嚟支持你呀？」。