【地靈人美】片岡沙耶　見完工趕去浸錢湯

好多打工仔辛辛苦苦完成一日工作，都想盡快返屋企浸個浴洗走一身疲勞，好可惜香港人為咗慳位，屋企已經愈來愈少有浴缸。相對地，日本人就幸福好多喇，因為佢哋就算屋企冇浴缸，亦有好多錢湯可以選擇，最近被稱為「爆乳小動物」嘅日本寫真美少女片岡沙耶就為電視節目《おふろやさん日和》演出，當中片岡沙耶扮演一位正在求職嘅畢業生，由於見工搞到錯過咗與朋友約好嘅聚會，所以就去到附近一間名為「榮湯」嘅錢湯放鬆一下。

喺節目當中，除咗可以見到身材婀娜嘅片岡沙耶表演出浴，介紹呢間位於南長崎，設計上仲套用孔教、佛教色彩嘅錢湯，沙耶仲會介紹一下附近嘅好去處，當中包括建造以紀念建造了紀念蘇格拉底、康德、孔子、釋迦摩尼嘅「哲學堂」。

或者大家好少聽過南長崎呢個地方，其實佢係位於東京豐島區，距離池袋都唔算好遠，區內景點除咗哲學堂公園，亦有法明寺、本妙寺等寺院，另外每年舉辦嘅鬼子母神御會式以及長崎神社獅子舞祭都係值得參與其中嘅當地重要祭祀活動。