【搵食CONY】FIVE GUYS開幕啦！不講噱頭 味道樸實的美式漢堡

繼Shake Shack之後，又一間美國漢堡過江龍進駐香港，並將於星期一（19日）開幕，呢間名為「FIVE GUYS」嘅快餐店，1986年在華盛頓創立，已有32年歷史，並擁有超過1,500分店，而香港分店更係全亞洲首間。想知有咩好食？CONY即刻帶你先睹為快！

話明叫「FIVE GUYS」，品牌最初真係由5兄弟經營。當時創辦人的父母Jerry和Jamie Murrell同佢地4個仔講：「一係你地就創業，一係你地就繼續讀書。」佢地最後揀咗創業，喺父母嘅協助下，佢地開咗一間小型漢堡包店，仲主打手工漢堡和以純正花生油炮製嘅薯條，強調新鮮美味。最後佢地打出名堂，第五位兄弟亦都出世，「FIVE GUYS」呢個名簡單易記得嚟，又代表到呢盤家族生意。

FIVE GUYS強調產品質素，不但在荷蘭有自家農場種薯仔，以人手切成薯條，再以花生油炸兩次而成，店內亦無冷藏櫃，唔會急凍食材，確保新鮮。品牌主打雙層漢堡，仲可以自選配料，有15款供選擇，就算你揀晒全部都唔使加錢。如果太懶唔想諗，都可以揀「All the way」，有番茄、蘑菇、酸瓜、生菜等8款經典配料，更特別嘅係你可以揀「走包」㖭！

熱狗係餐廳另一主打，有少見嘅「全牛熱狗」。至於飲品方面，美式快餐店指定動作梗係有奶昔，有齊士多啤梨、朱古力等基本口味，佢地仲推介客人加煙肉到奶昔中，據聞會好似加咗一種好香嘅鹽咁，別具風味。不過由於牌照問題，奶昔幾時可以賣就有待公布。

除了以上食物之外，餐廳仲有另一樣特別嘅傳統，就係可以任由客人食住花生咁等！話說創辦人唔習慣整食物時會俾客人望到實，於是就諗到不如畀花生佢哋食，而呢種傳統今次都帶咗嚟香港。

FIVE GUYS嘅食物雖然款式不多，亦冇什麼獨特嘅食材配搭或噱頭，但勝在味道樸實，份量足，而且有多款配料任由客人自行配搭，值得一試。不過提提大家，雙層漢堡對女生而言可能有點太大，大胃CONY都食唔晒。另外，CONY仲好期待煙肉味奶昔，究竟幾時會有售呢？

Five Guys
地址：灣仔莊士敦道60號嘉薈軒地下1B號