海俊傑錄新歌被監製叫回家唞唞 感激老婆犧牲瞓覺時間幫手化妝

海俊傑近日接受TVB娛樂新聞台《StarTalk》主播許文軒的訪問，自從返娛樂圈發展後，海俊傑除拍電視劇外，近日亦再推出新歌《一切出門之後可能發生的事》，他回想製作此歌的經過：「錄呢首歌嘅時候，撞正拍緊打拳節目《Fight盡》，當時每日不停操練，而我又唔係職業拳手，要一下子Push自己嘅狀態上擂台係好辛苦。好記得拍完上去錄音室成個人謝曬，監製莊冬昕見我咁嘅狀況叫我不如返去，因為唱歌都需要好大氣力，冇力會好影響錄音。」
談及新歌主題講「珍惜」，海俊傑說：「依家我好珍惜家人同埋跟太太相處嘅時間，太太成日陪住我，佢做化妝師，有時拍劇都係佢幫我化妝，咁我又可以瞓多一個鐘，不過佢就好辛苦，我拍劇通常開好早，我要叫醒佢幫我化，然後佢先可以瞓返，好陰功，係佢嘅犧牲！」