蘇致豪游學修否認嘲笑同業　Anson Lo回應：最緊要互相尊重

YouTube頻道「試當真」日前藉奧運熱潮推出節目《忍笑鐵人耐力賽》，廣邀藝人挑戰忍笑，其後在會員收費頻道上載「地獄程度MAX」的20條短片，當中包含MIRROR成員Anson Lo（盧瀚霆）的新歌《Hey Hey OK!》MV跳舞片段，被一眾神徒不滿偶像被取笑，狠批試當真心地差，揚言要退訂抗議，而昨日（17日）試當真發聲明道歉並下架有關影片，晚上兩位主腦蘇致豪（豪哥）和游學修亦親自為事件解畫，表明並非嘲笑Anson Lo，亦無心傷害同業。

試當真被罵後，將短片急急下架撲火，並發出道歉聲明：「我們一直為了搞笑努力拿捏界線，然而今次明顯拿捏失當。本台必須為是次處理不周負上責任。我們相信，搞笑需要勇於嘗試挑戰冒險，同時亦必須顧及他人感受。試當真謹此致歉，日後定必加倍小心。」

試當真昨晚（17日）的謝票場上，豪哥與游學修進一步解釋事件，豪哥將責任攬上身，首先澄清節目並非游學修的意念。「佢有份參與、做參賽，唔係製作組囉，咁推動開拍呢個忍笑節目，同埋一直堅持覺得，其實係咪唔需要道歉呢？呢樣嘢嗰個係我嚟嘅，我認為我擺嗰段跳舞片出嚟，喺會員區其實係冇觸犯到禁忌，亦都唔係想傷害呢一個同業嘅，即係同行啦，佢亦都冇觸犯禁忌，佢只係一個點樣嘅笑點呢？佢只係承接前面兩條片嘅鋪排，去製造一個反預期嘅效果，而去引大家笑嘅啫。」

豪哥續道：「呢一個笑點，最後就只係對我，同埋一啲留意到呢個精心鋪排嘅忍笑選手就有效，得會咁樣諗多咗一重嘅人，其實先至會笑嘅，因為我自己覺得一個笑話點解好笑，就係因為佢鋪排咗啲預期，然之後下一秒殺一個措手不及，違反咗個預期，咁你就會好笑喇。」

豪哥指自己是參賽者之一，「我初賽嘅時候笑咗好多條片，笑咗十幾條，其中一條就係Anson Lo跳舞嘅片，我嗰陣時冇覺得自己有任何嘲笑成份，我點解笑呢？好難解釋清楚，但係我會嘗試去講嘅。」他又澄清：「製造呢個笑點嘅時候，我覺得冇去到佢哋心地唔善良嘅，後尾諗清楚，我係覺得擺呢條片嘅拿捏，我哋係拿捏得唔好囉，基於我咁熟悉Black MIRROR呢個程度，我覺得自己有信心去判斷，fans們對呢啲可能會冒犯到佢哋嘅笑話嘅接受程度係去到邊度嘅，其實最後係拿捏唔到囉。我最近唔係跟得佢哋好貼，寫Black MIRROR嘅時候，其實我都跟得幾貼嘅，但今次我就有少少甩咗，而我以為自己係拿捏到㗎，所以先至覺得出囉！」

游學修亦有發言：「我覺得試當真應該要回應嘅，咁但係我同時又覺得喺Threads嗰度，其實我一直都冇出聲啦，其中一個原因，譬如我留言去回覆，或者我一出聲，只會吸引咗更多人去討論呢件事，我諗對阿Anson Lo嚟講、對fans們嚟講、對我哋對所有人應該係冇好處嘅。」他又表示自己正在學習不去澄清：「呢個我自己嘅課題，我就冇去澄清一啲嘢，譬如如果而家呢一刻，我用個人去講有啲觀感，我就會覺得譬如個標題啦，咩地獄level、地獄Max，其實佢係講緊某啲片，佢而家in general咁樣喺個post度睇出嚟，可能會有個觀感就係，我哋形容佢就係地獄max，呢個都係一啲好多呢啲細節上嘅嘢，冇辦法兩言三語可以澄清得晒嘅。」

游學修續道：「只不過係我覺得，我哋需要一個proper嘅回覆，同埋我唔想佢係由我呢一方去再令件事發酵得更大，大家細心思考同埋討論之後，今日都作出咗個回應，我覺得其實我哋係make咗一個好清楚嘅statement，我哋試當真嘅回覆係乜嘢、我哋嘅睇法係乜嘢、我哋嘅檢討係乜嘢。」

最後游學修強調，「如果後續大家要將呢件事賴到去，繼續惡言相向去對人哋嘅話，我覺得我會直接當嗰啲唔係我哋嘅fans，我都希望人哋嘅fans，唔好當嗰啲係我哋嘅fans，因為我而家就好清晰地make個statement，你哋如果唔認同我呢個做法，唔認同試當真呢個回應，或者唔相信試當真呢個回應係真心，或者乜都好啦，咁係你哋嘅事囉，如果你哋要繼續去開戰，其實呢件事冇人得益，總之，如果再有呢啲聲音，我覺得我唔當、你哋都唔好當嗰啲係試當真嘅觀眾。」

豪哥補充：「如果我一開頭咁做，係一定好笑好多，但亦都一定會冒犯咗好多人。」游學修則說：「但有時唔係淨係求好笑㗎，好笑唔係大晒㗎！」豪哥：「係呀！但佢係我最鍾意做，同埋我人生目標之一囉！」他又提出一個建議，就是他Cosplay Deadpool跳一次《Hey Hey OK!》：「但我要搵一個人教我，好認真學隻舞然後跳一次，大家無數啦，打和啦，好唔好啊？ Peace。」他又強調：「我冇可能跳得好過Anson Lo，但係我可以認真跳一次！」

至於今晚盧瀚霆Anson Lo在出席澳門新濠影匯的音樂會，都有向傳媒回應事件，他表示自己入行5年，各式各樣的評論都見過，坦言沒有因為今次事件感到不開心，亦沒有太大感覺。至於就蘇致豪和游學修承認今次在搞笑層面上拿捏不夠好，Anson Lo輕鬆地以相關歌曲的歌詞回應︰「我OKOK呀，放心！冇乜太大傷害性，我諗呢件事都暫告一段落。」他最不想見到大家嗌交，並謂自己的感受並不緊要，「最緊要我嘅fans同觀眾對呢件事有咩感受，最緊要都係互相尊重。」