讀公關出身但出現關公災難嘅盧卡古(Romelu Lukaku)，終於有地方收留佢並有波踢，意甲球隊羅馬與車路士達成協議，將會租借盧卡古一季，租借條款並沒有強制買斷條款，盧卡古將會係2024年6月回歸車路士，而羅馬將會支付高於500萬歐元嘅租借費，並以750萬歐元承擔盧卡古10個月嘅人工，因此羅馬大概以1250萬借用盧卡古一季🥹
現年30歲嘅盧卡古除左係世界盃世界盃同歐聯決賽淪為笑柄，今個夏天更將自己搞到身敗名裂，先係同國際米蘭傾好，等候國米籌集資金收購自己，但突然收到祖雲達斯向佢招手，就立即拒絕接聽所有國米隊友及高層嘅電話。然而祖雲達斯並無實際操作買盧卡古，因為祖記要買先要賣，結果加盟祖記不成，國際米蘭亦感到背叛退出收購行列，頓時間盧卡古無人問津，只有沙特聯賽嘅邀請，但佢又不感興趣，因此開季後一直留係車路士但並無任何出場機會🤭
話雖如此，如今羅馬確實需要一位有份量嘅前鋒，正中鋒艾巴咸(Tammy Abraham)重傷仍然未能上陣，上一場另一前鋒戴巴拿(Paulo Dybala)亦因傷退下火線，而前鋒比洛堤(Andrea Belotti)雖然係今季聯賽第一場個人梅開二度，但狀態不穩定加上踢法勇悍易受傷，變相前鋒線上急需人手，日前羅馬向德甲利華古遜借入伊朗前鋒阿斯蒙(Sardar Azmoun)，但對於摩氏羅馬而言，盧卡古將會係目前財困下最完美嘅人選。
首先當日摩連奴執教曼聯時，已經因為佢嘅才能而決意高價引入盧卡古，如今數年後兩者再度重逢，二人都對彼此相當熟悉，特別係摩連奴嘅防反戰術就係需要一位大舊全能中鋒做支點策應。不過，參考返國際米蘭時盧卡古同拿達路馬天尼斯呢對組合，盧卡古嘅工作更加多係利用佢嘅衝刺力入波，所以羅馬係盧卡古身上可取之處就只係其入球能力，畢竟羅馬長期欠缺一個有把握力嘅射手。今次係盧卡古翻身嘅最後機會，希望佢能夠生性踢波幫到摩連奴🥹
▼Follow 足球港場
Instagram: https://www.instagram.com/footballarena_hk/