娛圈單打︱躋身人生勝利組　提前上岸真正好

講起人生勝利組，大家會諗起邊個？本欄就諗起3位男子組代表，分別係「億萬駙馬」伍富橋、「三億女婿」袁偉豪，同埋「富貴人夫」高鈞賢！佢哋皆係夫憑妻貴，躋身豪門，令人羨慕！

嗱，高鈞賢去年底宣布閃婚，迎娶細10歲嘅富貴老婆，今年初火速造人成功，誕下愛情結晶。Matthew近日受訪大談升呢人夫人父感受，難掩喜悅之情。鬼咩，有個咁本事嘅太太，梗係笑不攏嘴啦。佢透露，老婆本身係富家女，經營美容生意，曾有過一段婚姻，育有一對仔女。

Matthew最初只係應邀幫手做宣傳，食過餐飯就冇下文，點知緣來沒法擋，疫情期間二人重遇，發現老婆內外兼備，非常識得關心人，做生意又叻，心生傾慕，終於擦出愛火！佢亦愛屋及烏，將繼子女視如己出。嗚呀，家陣高鈞賢唔止住豪宅揸靚車，仲可以專注家庭唔憂做咁款。睇到啦，老婆賢良淑德，老公提早退休，你話幾爽！

「億萬駙馬」伍富橋唔使多講，佢同老婆Shirley一直愛得癡纏，早前仲公開新進駐嘅九肚山獨立屋內籠，既有巨廳又有私家泳池，恨死隔籬。難怪網民眼紅大喊：姨姨，我不想努力了！

最後一位人生勝利組代表袁偉豪，一向係網民嫉妒對象，皆因佢娶咗貌美如花又多金嘅張寶兒為妻，日前更公布喜訊，迎來第二胎。即係咁，袁偉豪過去曾因為「拖鞋飯」等言論與網民開火，榮升人父後已經諗通，鮮再動氣。之不過，佢投訴被大台投閒置散冇工開，高層冇一個伸出援手喎。喂，會唔會人哋見你上晒岸，生活美滿，先至唔敢勞煩你咋？

東網網站 : https://on.cc/東網Facebook專頁 : https://www.facebook.com/onccnews/