新年最怕被親戚問的6大問題 每個新年都要loop一次！

新年又準備到，大家係咪都準備好向親戚逗利是呢？不過想逗利是，一定要過親戚問東問西呢一關。今次筆者為大家精選6大新年有機會被親戚問到的致命問題，又教埋大家點解答～

新年最怕被親戚問的6大問題 每個新年都要loop一次！

1.「幾時結婚？」

親戚問得呢個問題，都唔會care你係咪拍緊拖，即接就問你幾時結婚。對於單身嘅人當然會好老尷，唔知點樣去覆好，或者可以霸氣地答佢一句：「冇女啊！你介紹啊？」；對於有拍拖嘅朋友仔，可以試吓答：「冇樓啊！點結啊！」，兩個答案都有異曲同工之妙！

2.「幾時升職啊？」

升職加人工係人都想，不過當親戚問及呢個問題時，就好似特登去篤你痛處一樣。呢個時候你更加會想反問自己：「係囉，我到底幾時升職？」，引致你出現懷疑人生嘅諗法。不過你都可以覆佢哋話：「升職？就啦，下星期返去就俾人升啦」去耍走佢哋。

3.「幾時買樓啊？」

香港土地問題好嚴重，而且樓價亦冠絕全球。當親戚問到你幾時買樓時，試吓霸氣地講句：「哪有錢！你XX」，然後再將個問題怪責去社會，話係社會嘅錯令到自己買唔起樓！

4.「幾時生仔？生幾多件呢？」

呢個問題都十分難拆解，老一輩人眼中認為只要有另一半就一定要生仔，叫做令到個家族有得繼承。不過新一代後生仔普遍都未必想生，呢個時候試吓話：「唔生啦，一生出嚟就要戴口罩，好攰姐！」，將個問題去推落疫情度！

5.「對未來有咩打算呢？」

雖然「未來還未來」，但親戚都好希望聽到你對於未來嘅一個計劃係點樣，而且仲會幫你評價吓實行性高唔高。不過相信後生一代都好唔想答人哋自己未來係點，直接同佢講未來想入Marvel拍戲，依家學緊英文，可能會一下子嚇疾佢！然後再跳起身扮GG人，完美化解！

6.「會唔會移民啊？」

移民呢個話題都係近幾年香港人成日都會提起嘅話題，亦都成為一班親戚好鍾意問嘅問題。你話想移佢哋又可能會加多兩句，話唔移又會問你點解，呢個時候最好就答佢：「可能啦，睇吓移新界定九龍抑或是港島囉～」，令到佢冇得再追問你！