根據Fabrizio Romano嘅報導，哈利簡尼獲得飛行許可，即將抵達德國接受體測，並馬上成為德甲班霸拜仁慕尼黑一員，轉會費為一億歐元+2000萬歐元浮動條款，雙方將會簽約4年至2027年，哈利簡尼轉會風波正式落幕✍🏻
由拜仁數次報價被拒，到臨開季先接受拜仁報價，之後有Sky Sports報導簡尼個人意願傾向留隊，其後再選擇轉會拜仁，係接近起行嘅時候又被利維因為轉會費細節被拒絕離境，最終一切都塵埃落定😶🌫️
一億歐元購入英格蘭頭號射手，呢單史詩級轉會及後或許可以探討兩隊球隊嘅組軍方針。拜仁慕尼黑今夏為左購入哈利簡尼，不惜代價並出售文尼以籌集足夠資金，後場有金敏哉(Kim Min-Jae)嘅來投，中場嘅哥列斯卡雖然退化但有萊馬(Konrad Laimer)補強，前場實力更不用說，因此唯一仍要補強嘅地方係門將位置。首席門將紐亞(Manuel Neuer)過去因為滑雪而受傷骨折，現時接受手術後或會到2024年先至復出，因此拜仁需要一位新門將，如今邦奴(Yassine Bounou)、奴利(Geronimo Rulli)同Kepa都係目標之一，但拜仁仲有無足夠資金引入門將就成為考慮嘅地方🤔
熱刺方面開季前先失去哈利簡尼，嚴重影響賽前部署，加上英超軍備競賽，熱刺好大機會失去前七位置。雖然球員離去，要暫時用李察利臣(Richarlison)打正箭頭，但有一億歐元都可以作出好好嘅補充。當然，要再重複過去分散買人購入「熱刺七子」定係購入一位有份量嘅前鋒，就要睇利維嘅決定，因為前中後三線仍然要補強，不過前鋒位置上仍有人選，例如無路可走嘅盧卡古(Romelu Lukaku)、同富咸鬧翻嘅米祖域(Aleksandar Mitrovic)、暫時被停賽嘅艾雲東尼(Ivan Toney)同世界盃亞軍成員高路梅安尼(Randal Kolo Muani)都係潛在目標🎯
▼Follow 足球港場
Instagram: https://www.instagram.com/footballarena_hk/
留言 0