黎監製臨時加嘢，搞到Winki好崩潰。
無綫綜藝節目《不可能任務》第二季將於本周日（6月4日）晚播出最後一集，踏入直播日前夕，幕後經驗不足的眾人依然亂作一團，突發事更一單接一單！首先監製黎諾懿開show前，忽然加插表演，令原本幾經辛苦度好內容的賴慰玲（Winki）計劃大亂，更忍唔住爆咗句：「可唔可以辭職㗎？！」
正式直播之前，黎監製同賴導演密密斟。
之後到綵排「迷你舞台劇」又狀況百出，更有演員臨時辭演，搞到做PA的關楓馨（Fabi）要頂硬上兼顧幕前。對於眾人表現，有份演出舞台劇的蔣家旻及袁偉豪事後雖然正評，但不無擔心謂：「佢哋年資尚淺，去到舞台上我哋做演員都好迷惘。」
Fabi到最後要兼顧埋幕前。
正式直播當日，八人團隊緊張指數爆標，更要連環對付因經驗不足引發的種種問題。最後眾人順利完成挑戰，更獲得「幕後黑手」曾志偉嘉許，曾志偉大讚眾人表現，並親自拆解是項「不可能任務」背後真正原因，及大派勵志bite：「演而優則導唔係淨係電影，電視都可以。」
原來成件事嘅幕後黑手係曾志偉。
是集洋蔥聖手還有戴祖儀（Joey），獲監製指示為舞台劇歌曲作曲及填詞，由於撰寫歌詞熱血又勵志，令Winki及梁超怡等勁感動，李芷晴更忍不住落淚。
留言 0