娛圈單打︱女神配對好鬼甜　睇到觀眾好肉緊

葉蒨文（右一）與曾展望疑似戲假情真撻着。

TVB第一個戀綜《女神配對計劃》備受關注，皆因女神之中不乏「好波之人」，參加者又狀甚騎呢，未開播先興奮。星期日終於播出第一集，女神們完全冇令人失望，個個有睇頭，但論到最大回響咯喎，首推《愛．回家》CP葉蒨文同曾展望！

嗱，曾展望向女神嘅一番表白真摯動人，佢細數好耐之前已被女神吸引，可惜女神當時有男友，所以唔敢追。直到近排知道女神單身，與其被人追走，不如自己參加節目示愛。佢連林子祥都搬埋上枱，自爆同林子祥同一日生日，而林子祥個老婆又叫葉蒨文喎。嘩，呢番表白唔止Sweet，仲好有心思，女觀眾仲話被感動到喊添！

葉蒨文同樣眼濕濕，毫不猶豫直衝上去為男方戴上「心動頸鏈」，輕鬆過關！佢哋喺《愛．回家》已係好拍檔，展現出嚟嘅心動感唔似做戲，難怪有網民隨即爆料，話「佢哋本身係情侶，半年前已經同居」，其他網民都信以為真，紛紛送上祝福！曾展望忽然被人「恭喜」，惟有坦白從寬，聲稱十畫未有一撇，同居機會並不屬於佢。

唔緊要啦，世上無難事，只怕有心人。連葉蒨文都話曾展望係佢理想型，開晒綠燈咁款，只要加多把勁，抱得美人歸並非不可能。之不過唔係人人咁好彩，另一女神李芷晴，就當面請暗戀佢多時嘅周嘉全食檸檬，因而被網民鬧爆佢係勢利港女，嫌棄男方冇錢冇前途喎。

喂，既然係配對節目，女神們當然有選擇權，直接拒絕總好過當人觀音兵啫，此亦證明觀眾睇得投入。但謹記，始終只係一場騷咋，可以投入，不宜認真！

娛樂