政Whats噏：還押半年瘦3公斤　毛孟靜踎監灰到爆

因參與舊年嘅民主派35+初選，而涉違《港區國安法》被控串謀顛覆國家政權罪嘅前議員毛孟靜（毛婆），已經還押咗將近半年，另一名前議員邵家臻今日(25日)喺社交平台貼文透露佢嘅鐵窗生涯。

佢話還押咗咁耐，感覺一直「超現實」，雖然佢以前着衫，鍾意揀灰色，認為呢隻色夠高貴，但收押所內嘅窗閘鐵枝、櫈床地門都係灰色！雖則衞生情況好得直逼家居，但係呢張灰色嘅網令佢倒胃，仲話以後着灰色衣物要再諗諗嘞！咁講，簡直係灰到爆喇！

唔少被還押嘅泛民人士都話瘦咗，毛婆都唔例外，佢話還押初期瘦咗3公斤，到依家體重亦再無升返上去，但亦冇再瘦落去。依家佢喺收押所嘅工作倉做嘢，負責摺疊、黏貼政府公文袋。佢仲為監倉內嘅年輕人開英文班，得閒又會努力重拾丟低咗好耐嘅法文喎。

東網網站 : https://on.cc/東網Facebook專頁 : https://www.facebook.com/onccnews/