應節菜式　自製芬蘭式烤豬肩

聖誕老人村在北歐芬蘭，想感受當地節日氣氛又唔一定要飛芬蘭，大可以跟尖沙咀一間酒店行政總廚兼來自芬蘭的Chef Jaakko Sorsa學整聖誕大餐主菜，他指當地人唔會食火雞，反而愛烤原隻火腿來開心Share，不過香港多是小家庭，他就建議以豬肩肉來代替。做法非常簡單，豬肩肉加調味後慢烤14小時，以保留肉汁和肉味，之後再掃上芥末醬和磨得幼細的麵包糠再焗一會便完成。厚切的豬肩肉配上自己喜歡的蔬菜或醬汁，入口啖啖肉又Juicy，相信各位主婦都可以零失手完成。

材料：

豬肩肉　1.5公斤

鹽　少許

黑胡椒　少許

蛋　1隻

芥末　4湯匙

糖　2茶匙

麵包糠　4湯匙

做法：

1.豬肩索乾表面水分，灑鹽和黑胡椒碎，用錫紙包好，以攝氏75度烤14小時。

2.蛋、芥末和糖拌勻，掃在豬肩表面，麵包糠再打碎，蓋在豬肩表面。

3.放入攝氏250度焗爐焗約5分鐘便成。