起床都要充滿儀式感 這些方法助你醒神

起身乃人生一大難事，就算解開到被鋪嘅封印，個人都仲係好唔清醒又遲頓，冇記性、出門遲到都算事小，調轉件衫著或者鴛鴦襪俾人見到就真係好瘀喇。為咗等自己快啲清醒，以一個精神嘅狀態開始新一天，有啲「儀式」都幾重要㗎，不如睇嚟下有咩醒神好辦法啦～

1. 閉目養神三分鐘

無論係邊個，都很難一擘開眼就非常精神，因為人嘅大腦喺經過長時間休眠後，都需要一段時間先可以完全運作，所以瞓醒之後，唔洗急住落床，可以先閉目養神三分鐘，但記住唔係瞓返呀，係坐喺度㗎。

2. 增加環境光線

光缐能夠減少睡眠慣性，即係我哋仲好眼瞓嘅狀態，所以只要增加我哋身處環境嘅光線，例如拉開窗簾、開燈，就可以幫我哋提神㗎喇～

3. 活動肢體

啱瞓醒可以留喺床度做少少運動先，例如伸展下四肢、伸懶腰，之後都可以搓熱雙手，再「乾洗臉」；起床之後洗面刷牙都有助醒神㗎。

香港人生活節奏急促，連起床呢件事都慣咗好急，但其實起床係應該慢慢嚟，建議大家將鬧鐘較早五分鐘，俾啲時間自己「熱身」，起身就會變得冇咁困難～