九展完成歷史任務　向大家道別

再見九展

喺上星期，九展完成歷史任務，向大家道別。依個地方對我而言好有意義，所以想藉此以文字記低一下感受，成篇文比較個人，請大家見諒。

「離別這刻都不算糟仍為這刻感恩碰到仍舊記得彼此最燦爛的笑就最好」

九展近年喺香港流行文化嘅地位僅次於紅館，係唔少表演單位首選場地，舉辦咗無數個演唱會、見面會、展覽等等，可以話承載住大家嘅回憶，亦見證一代香港音樂人成長，係唔少人夢想嘅發跡地。有啲已經大紅大紫，亦有唔少已經放棄咗佢地嘅夢，但同樣地曾經喺依個地方渡過咗一段難忘時光。

「任作品如何變任角色如何演共你都經歷長大長大之後更珍惜再見」

因此，九展結業對香港表演者影響頗大，選擇更少下場地檔期變得緊張。Music Zone尚有東蒲同西九Freespace可以替代，但Star Hall依種中型場地喺香港非常罕有，唔少單位上大場前都會用佢嚟小試牛刀，測試下自己嘅叫座力。依家變相要由麥花臣千幾人嘅場，一下子去到會展或者博覽館唔同hall，觀眾人數多咗唔少之外，場地設計同配套完全無得比，令歌手甚難預算。

而新場地亦不足，其他替代場地好似西沙或者機場，實在太唔就腳，講緊來回要超過一個鐘，某程度上會降低大家入場意欲。交通方便啲嘅中環海濱同竹翠位處室外仲要相對大型，唔太適合香港歌手。

仲未計九展成熟嘅配套，大如入場安排、散場交通，小如場地音響、洗手間，大部分場地（特別係室外個啲）都無佢做得咁好，未來相信大家需要啲時間習慣。

「說說笑笑來面對再見好嗎？卻是太難制止淚會不禁落下」

跟住就講講我喺九展嘅回憶。首當其衝當然係見證好多歌手第一次開show，好似Jay Fung、Pandora、Lolly Talk，仲有唔少精彩演出，例如Frenemy演唱會、嘉豪Cleanse簽唱會等等，每次嚟依到總會愉快地離開。

另外，去年開始我有幸喺九展工作咗一段時間，雖然位置真心唔算方便，野食選擇又少，但對我依位香港流行文化fans而言，其實幾開心。講緊收工就可以落去睇戲睇演唱會，仲睇咗唔少viutv搞嘅記者會，近距離咁見到唔同藝人，就算平日喺樓下都有機會撞到artist（我揀sica嘅《再見有時》正正因為我撞過佢好幾次🤣），為我喺苦悶工作中帶嚟一點快樂。