平時去金紫荊生記粵菜廳是食晚飯多，今次就同好友食個晏，仲有金朵金紫荊及海景伴食，又真是幾舒服。今次點呢個傳𠄘美饌套餐，又有精心四式點心、天天不同時令足料靚湯，約1斤重的活生澳洲龍蝦一隻，仲有三選一烹調方法任我地揀，可以是特色生炒糯米飯或花彫雞油鮮拆肉蒸陳村粉或香辣黑椒焗配鮮磨菇；仲有玻璃脆皮貴妃雞半隻及完滿甜品配精美糕點作結，四位用$988，相當抵食。
筍尖蝦餃皇 出去飲茶好多蝦餃只得蝦，筍就好少見，但師傅保留傳統的做法，大大隻爽口又彈牙的蝦餃，內有爽甜的筍絲相伴，更添清爽的口感，與鮮甜的蝦肉更是最佳拍檔。手工切肉燒賣 由於是手切肉的關係，豬肉入口煙韌，有咬感更具彈性，有別一般的燒賣，好味。金錢棉花雞 取靚棉花肚及用將新鮮雞肉起肉再醃，魚肚吸收晒雞的精華，入口軟腍入味，雞肉嫩滑無比。面層放上大大隻花菇，菇香樸鼻，一啖咬下，菇汁更全滲在口腔內。鮮蝦蒜香春卷 外脆內嫩的春卷內全是蝦肉，鮮甜味道百分百。每日天天不同的時令足料靚湯。今日就飲了節瓜鱆魚煲唐排，湯頭超級的清甜，節瓜煲到腍腍的，入口即溶，連唐排都好腍，連湯渣都清晒。活生澳洲龍蝦一隻，今次揀花彫雞油鮮拆肉蒸陳村粉，主角蝦都好厚肉，入口真是啖啖鮮甜的龍蝦肉，不過配角陳村粉更是吸引，吸收了龍蝦的精華，還有花彫的酒香，真是令人一試傾心，最後當然是美人照鏡喇！玻璃脆皮貴妃雞半隻 貴妃雞大家就食得多，這個新食法，以貴妃雞做法，先用足料醬汁及配料浸至入味，再掛起風乾十個鐘，最後再加埋蛋白漿令皮炸後更脆，這個大廚的獨特做法，更是全港獨有，入口做到皮脆肉嫩，滋味程度攞滿分。豆腐雕花在薑湯下成一件食得的藝術品。最愛是那個薑湯豆腐花，真是好夠薑，還有芝麻卷，入口啖啖的足料芝麻香，同樣好好味。最後值得一提是，金紫荊生記粵菜廳逢周六及日，11:30-14:30凡惠顧任何套餐，每位加$298（便可任飲Moet ＆ Chandon Imperial 香檳）無限暢飲2小時，今日我都飲左幾杯，愛飲酒的朋友，更是不能錯過。
金紫荊生記粵菜廳
地址: 灣仔博覽道 1 號香港會議展覽中心博覽商場鄰近金紫荊廣場
電話: 25827729 56973088 (WhatsApp)
留言 0