IQ題～平時樓下保安都唔理你，到邊個節日會突然好醒神咁幫你開門、又笑著迎接你呢？估中咗啦！就係新年啦！家家戶戶的保安們都會突然醒神，又或者樓下突然多了兩三位保安（明明得一個座位），想避開保安的熱情攻勢？即刻教你4招啦！
新年樓下保安看更又開始精神 4招如何避開攻勢！
1.搵到相熟保安即刻衝埋去先入為主
相信身為有禮貌嘅香港人，平時都一定會對自己樓下嘅保安打招呼，唔多唔少都會認得佢哋嘅樣。呢個時候一落樓見到成班保安準備衝埋嚟恭喜你嘅時候，試吓先入為主，入佢中路，直衝相熟保安度再講聲恭喜發財，然後再塞封利是俾佢，最後用趙雲七進七出嘅技巧全身而退，完美！
2.拖字訣
拖字訣呢招雖然陰濕，但係其實十分有用。每次落樓見到保安開始湧上嚟，就即刻厚面皮再加啲劉德華演技講聲：「哎呀！唔記得帶利是落樓！」，順勢用Michael Jackon Moon walk向門口方向移度，呢個時候最好口中再伴隨著：「走先啦係咁先啦，下次再派啦」，目的係教班保安多啲支持廣東歌。
3.疫情之攻勢
依家香港疫情相當嚴重，每個人對於染疫都十分擔心。可以試吓帶定利是，當保安開始展開攻勢之時就扮咳，當佢地一呻手之際你就一路咳一路拎利是，佢哋一定會避而遠之，連拎都唔敢拎，即慳幾封！
4.成本降低大法（最終秘技）
如果你對於以上方法都比較唔想做的話，就唯有用成本降低大法了。呢個時候你需要幾種唔同嘅利是封，而唔同利是封入面嘅裝住嘅金額都唔同。而保安個幾封就….你哋自行根據財力去決定吧！又唔可以太少唔可以太多，呢個拿捏位唔係咁易，不過咁大個人要掌握吓！
原文刊於：NEW MONDAY
留言 0