啱啱過去嘅星期六（10月27日），陳奕迅（Eason）同The DUO Band喺中環海濱舉行《L.O.V.E. IS L.I.V.E.》音樂會。佢喺現場一共唱咗20首歌，其中7首係未派台嘅新歌。
音樂會開始之前，陳奕迅同The DUO Band喺台上為盧凱彤（Ellen)留一席位，放上一束白色鮮花同埋佢生前用過嘅結他，就好似話畀Ellen知，「我哋（一齊）開show啦～」
佢嗰日唱咗20首歌，第三首就唱盧凱彤有份參與作詞嘅歌《海裡睡人》，大會喺Eason唱呢首歌時，特別拍低台上Ellen生前用嘅結他。唱完再掩面望天拍掌，彷彿多謝盧凱彤嘅努力及貢獻。除此之外，佢唱歌嘅時候，不時向天上望，大概佢表演時都記掛住團員之一嘅Ellen，藉此表明心跡。
Ellen嘅Fans 完show後係陳奕迅嘅official IG度留言多謝Eason帶埋Ellen表演、合照。
Eason不嬲都錫歌迷，佢喺音樂會上講起搞演唱會，Eason話：「我申請過紅館暑假檔期，可惜唔成功，我未做過跨年，試下可唔可以喺2019年開跨年演唱會，死都希望一試。」
有傳謝霆鋒同陳奕迅爭同一個期開演唱會，E神就咁回應：「我只求明年12月中至1月中，他改開農曆年得唔得呀？希望大家支持我，我好唔要臉講到出口，希望做到人人有飛睇，我開30幾場都無問題呀！」
之後仲話：「叫他前啲、後啲得唔得？我係歌手嚟咖！」更笑言霆鋒應該去煮嘢食。之後Eason先打圓場話：「霆鋒係幾靚仔嘅！」引嚟全場觀眾大笑。
Eason揹起盧凱彤嘅結他，同樂手牽手謝幕，而有樂手就手持一張有盧凱彤嘅DUO Band舊照。歌迷們都覺得唔夠喉，大叫「EnCore」，最後Eason喺中環摩天輪以《幸福摩天輪》作完美落幕。
Eason粉絲都大讚佢今次音樂會狀態大勇，表演令人感動！
Text: Holiday Editorial
（小編公告：如果讀者有任何關於美食、旅遊、玩樂、或者任何新奇有趣事物既資訊，都歡迎話比小編們知～大家可以透過Facebook inbox、或者send e-mail到holiday@presslogic.com，直接將資料傳比小編）
留言 0