曾國衞：我既要清一色，又要五光十色 稱以往選制「太容易」

（獨媒報導）自2021年「完善」選制以來，時有爭論香港搞「清一色」抑或「五光十色」。政制局長曾國衞今早在一個立法會小組委員會分享其看法，就是兩者都要，「我既要清一色，又要五光十色」。他又不認同區選無競爭，因為「自己話自己幾叻無用㗎，要令人明白信服」，相信候選人獲確認提名後就會「各顯神通」，市民可以感受選舉氣氛。曾國衞又大談新選制的難易度，他說：「我起碼會講唔會容易咗囉」，因為過往選制設計「太容易喇」，他稱有人利用「不良選舉手法，從而騙取議席」，要防止亂象再生。

陳勇稱2019年穿防刺服企街

立法會「完善選舉實務安排事宜小組委員會」今早開會，主席陳勇忽然談到，今次區議會選舉因為大家都是「愛國者」，「結果呢大家都謙謙君子嘅時候呢，無以前嗰種生死之戰嗰種火藥味」，他稱以前打交、報警比比皆是，尤其2019年「我要著防刺服企街嘅，幾咁恐怖」。陳勇問局長，旁觀者認為區選「火藥味唔夠」，當局如何令選舉「更有睇頭」？

陳勇

政制及內地事務局局長曾國衞表示，有人質疑火藥味大不如前，「甚至乎話，係咪清一色啊你哋而家搞」，他不諱言「我既要清一色，又要五光十色。清一色係愛國者，五光十色係唔同光譜，唔同專業界別，我哋都要。」他不認同無競爭，因選舉比政綱和能力，「你自己話自己幾叻無用㗎，要令人明白信服，先有用㗎」。

曾國衞

狄志遠不滿三會篩選

新思維狄志遠自言有份參與爭取提名，發現有一定困難，例如三會成員說「我有個黨友參加，無理由提名你」，變相黨的決定大於選民決定，經三會篩選後「細黨、獨立人士空間細咗好多，係咪恰當呢？」

狄志遠

曾國衞回答指有人反映今次選舉「好似難咗喎」，「我起碼會講唔會容易咗囉」，他稱今次制度設計是因應「過去太容易喇」，只需要取得一定地區提名就可入閘，他稱令很多非愛國愛港者、沒有地區經驗的人，只需喊口號、在政治氣氛下譁眾取寵，「再加上不良選舉手法，從而騙取議席」。他又認為現時民政處的安排合理，有足夠渠道聯絡三會。

林琳稱有人為取提名上門撳鐘滋擾

林琳

民建聯林琳不同意狄志遠看法，他指民政處幫手是「好大突破」。她又稱得悉有候選人為取得提名，「上到人哋屋企撳鐘，滋擾家人」，她批評做法絕不可取，不應藉此「搶眼球、做藉口，而唔去檢討自己能力，自己做法係唔係一個愛國者，衰喺邊度」。她更擔心日後做三會成員「有候選人摷到住址搵到屋企人」。曾國衞指或有個別人士為盡量爭取提名，採用「急躁急進」做法，若真的造成滋擾，他指「有需要時咪報警求助囉」 。