打機達人達哥（林慧韡）向來在YouTube直播打機，日前相約洪天明打機，令不少網民感到驚喜，網民一開始便洗版留言：「壽司」、「花之戀」、「今日有冇花之戀？」洪天明亦大爆「花之戀」的去向及平日明星足球隊的秘聞。
達哥直呼洪天明做「專業壽司代言人」，洪天明就澄清：「冇食好耐喇！」然後他又解釋：「大家誤會，想當年獎門人雖然係有好多花之戀券我係贏咗，但唔係我自己一個人食嘅，都派晒畀人，自己keep啲，跟住派畀朋友，我一個人點食咁多！」他笑指自己已有十幾年沒再壽司店，但早前特地帶兩個兒子去試試。「十幾年冇去，都係嗰個感覺！」
洪天明在節目中自爆是資深機迷，有很多年的機齡，就連一些很冷門的遊戲他都講得出，又自爆以前經常跟謝霆鋒、安志杰、Eric Kwok（郭偉亮）等人打《Warcraft》（魔獸世界），曾夢想做打機主播，但近年已很少打機，原因與很多機迷一樣。「我老婆其實唔係好鍾意我打機，我話做嘢囉。好多時都話做嘢，跟住出去打機，不過留喺香港時間唔多，所以返嚟都係做嘢同陪屋企人多。」
這次洪天明與達哥直播玩足球遊戲《FC 25》，被問到有否見過父親洪金寶踢波，他說：「嗰時可能10歲11歲，明星隊喺九龍仔踢，佢唔係踢波，總之跑到埋去個波嗰度，（隔籬）個人就『Boom！』飛開咗，佢只係撞一撞個人，就飛開咗，但係個波仲喺度，跟住佢就自己一踢，個波就唔知去咗邊度，好似《少林足球》咁。」至於洪金寶踢哪個位置，洪天明說自己當時不太懂得踢波，所以不清楚，只見到老竇四圍撞。
洪天明在明星足球隊中踢「後衛」，即場大爆不少明星足球隊秘聞，直指以張國強球技最勁，梁漢文亦踢得好，許志安的體能、爆炸力也很好，而他自己就「屎波」。「我上年明星隊踢咗10場波，都入唔到一球。」有網民問他現時明星足球隊是否已「分家」，洪天明解釋：「好似有一對叫精裝明星隊，好似因為叻哥（陳百祥）對於踢波方面有要求多啲，而家對於我哋嚟講，比較友誼賽多啲。」
達哥追問洪天明屬於哪一隊，他巧妙地回答：「我都係明星隊，叻哥嗰度我都有踢過嘅，不過就少啲。校長（譚詠麟）都74歲，佢仍然可以落場跑。以前玩明星隊好慘，攞到個波交畀一個人都比十個人鬧！其餘嗰十個都鬧你點解唔交畀佢，所以我以前都好習慣，要好識做。」
洪天明罕有地參與達哥直播，不少網民大讚他很友善、很有觀眾緣，具綜藝感，全程沒有冷場。洪天明亦感謝觀眾十分客氣，直言：「可能我呢幾年唔喺度，有時睇啲評論都好負面，會鬧，今日好好，大家都好好。可能有啲好偏見話你唔好，但係冇辦法，每個人都有鍾意同唔鍾意嘅嘢，劉德華都有人唔鍾意啦。」達哥就叫他多點留香港一起打機，洪天明亦表示想多點返港。