懷疑黃奕晨有第三者 吳嘉熙：令到我對佢嘅信任完全瓦解

女子組合Super Girls成員吳嘉熙（Cheronna）日前接受網上平台訪問，她坦言過往曾經拍過不少散拖，直到近年有一、兩段感情令她成熟了不少，其中一段是與夏雨兒子兼ViuTV主持黃奕晨（Dixon）的戀情，她說：「同Dixon嘅關係係其中一個成長，再之前嗰一段感情處理得唔好，我將呢樣嘢放咗落去同Dixon嗰段關係，對方係要控制晒我嘅一切，之後有個智者提醒我，呢個都係我嘅責任，因為我太怕失去一個人，縱容對方去咁做，令一段關係失去咗平衡。」
Cheronna表示當時拍了拖3個月已經是噩夢來臨：「我哋前後拍咗拖兩年，但係中間係有一段時間唔開心，係有佢講冇我講，跟住仲影響咗我同媽咪嘅關係，搞到我有陣會忽略媽咪嘅感受。」自言是戀愛大過天的Cheronna，將對方放到很大：「有好多嘢係對方逼我埋牆角，連同朋友傾偈都唔得，變咗我係喺好大嘅壓力下去生活，我就用傷害自己嘅方法希望冇事，自己摑自己，打落牆搞到自己瘀晒，啲碟掃埋落地，照踩上去啲碎片度，如果我唔傷害自己件事就繼續落去，最少折磨期要經過3日先好少少。」
最後Cheronna決定分手，其後可能因為這一段不愉快經歷，令她難投入和Dixon的感情：「我成日同Dixon講不如我哋順其自然，一齊得幾耐就幾耐，可能我太抽離，搞到佢冇乜安全感，之後再因為一啲事情，令到我對佢嘅信任完全瓦解，我唔知呢個第三者係咪的確存在，可能行動上令我誤會嗰個係第三者，我冇搵真相，總之係因為一啲嘢，冇咗個信任，直到我哋完為止，都係冇呢個信任，最後係佢提出分手，我都知係辛苦晒佢。」她希望下一段情可以學識放鬆及學懂感恩：「希望可以係最後一段情，因為我唔想失戀，真係好辛苦。」