一舞傾城｜鄺潔楹拍SM戲勁不安 37度赤腳踩甲板人都癲

鄺潔楹話拍呢場感到好緊張同埋不安。

無綫劇集《一舞傾城》昨晚（24日）播出一集，劇情講到細細粒（鄺潔楹Judy飾）有感連累Money（文凱玲飾）欠下周身債，遂答應陪練馬師上船過夜幫手還債，但原來練馬師有鋪SM癮，被綁在牀上的細細粒慘遭練馬師蹂躪，最終導致遍體鱗傷。

遍體鱗傷。

講到相關場口，Judy坦言很緊張：「從演以嚟都未試過咁大尺度，事前都有做定功課參考一啲虐待戲應該點拍。」Judy續指一換上SM戲服已經入戲，她說：「一上到張牀鎖上個手扣，個不安感覺已經出咗嚟，對我嚟講係好真實，呢場戲我係一秒都冇放鬆過，就連排戲嘅時候我都叫佢哋綁住我，因為我想攞嗰種感覺，同埋見到好多刑具喺現場，望落去已經好驚，所以我係用當下嘅情緒去做呢場戲。」問到事後有否陰影？Judy說：「都冇嘅，嗰日係我嘅煞科戲，知道拍埋呢場就冇辛苦戲，所以之後嘅心情都有放鬆到。」

Judy謂一上到張牀鎖上個手扣個感覺已不安。

講到之後的落船崩潰戲，Judy直言：「本身係擔心應付唔嚟，因為比較少做情緒化嘅戲，呢個唔係我嘅強項。拍呢場戲另一個難度，就係當時天氣有成37度，劇情係要我赤腳行落甲板，一踩落甲板已經好唔舒服，好似俾火燒咁，成個人癲咗咁，有啲位係嗌咗出嚟發洩，呢場戲最終兩Take就搞掂，當下演出嚟係最真實。」

呢場崩潰爆喊戲，鄺潔楹話最辛苦係赤腳行甲板，好似俾火燒咁。

今晚一集的重頭戲，有楊明一個打十個及與姚子羚的激吻場口。楊明說：「我同子羚本身都好Friend都冇咩尷尬嘅，原本以為只係好簡單嘅鏡頭，點知拍攝時導演要一個360度嘅Shot，拍完順時針之後再要拍埋逆時針，第一次接觸呢個拍攝方法，呢個鏡頭都拍咗好幾分鐘。」