應該原諒自己定對付自己? |《公司冇迫我跑馬拉松》保錡和阿神的真人對話
月巴令你唔開心，但要減肥必需對付自己，有時唔小心食左杯雪糕，免除內疚你會立即原諒自己 (一杯之嘛、好難得減價)。做人要快樂嘅話，應該原諒自己定對付自己?
「我做Error時，俾人話呢4隻騎呢怪，唔當我係artist。我都享受做小丑，但唔想做一世。雖然好努力去唱歌，佢哋話不如你做番小丑。我要用跑步證明我嘅努力同認真，因為跑步成績只能用汗水同意志換來，唔可以靠包裝。你做得到，人哋唔會睇小你。」
保錡是個對付自己的人，Viu TV 開拍真人騷『公司冇迫我跑馬拉松』，保錡話係佢迫公司俾佢跑馬拉松。真人騷目標是用8個月時間，跟不同的教練訓練，參加多項本土路跑賽 (包括渣馬10K)，終極到2023年尾參加台北馬拉松。保錡要完成一隻初馬去證明這個證明。
真人騷原本有8位都是跑步素人的藝員參與，他們日間都有自己的工作。開拍不久即有人因不同原因離隊，最後剩下5人，他們戲言: 長跑精神，每次少個人。阿神 (曾贊學) 是其中一個留下來，班中慢腳，冇速度，欠耐力，操練都在隊尾喘氣。他說膊頭甩骹，跑每一步都痛，又唔夠瞓，保錡覺得佢搵藉口，是原諒自己的人，但他點解會留下來? 又如何去應付一隻初馬? 42.195K喎!
約保錡做專訪，他問可否叫埋阿神? 當然歡迎，有溫度的巴打情 (唔係hehe專利)。我們由大埔的大王爺廟出發，沿吐露港用溫和可親的pacing，跑到科學園飲嘢望海吹水，又唔洗好羨慕嘅，畢竟只係兩個中佬同一位樂悠咭。
真人騷有幾真？
「『公司冇迫我跑馬拉松』好受歡迎，其實真人騷有幾真?」
「老實講，有啲真人騷部份係情節係按需要設計出來 (阿神舉了些例子，但不便在此踢爆)，不過呢套係100%真。」阿神憶起仍有些痛苦表情。
「起初跑係辛苦，所以有啲參加拍攝嘅 artist，跑左渣馬10K之後就放棄，冇繼續拍。跑步過程就好似一粒三尖八角嘅石頭，慢慢被水衝激打磨，最後變成光滑。」保錡擅長用比喻。
「好同意，以前我介意自己才能唔夠人好，學嘢唔夠人快。但只要付出努力，一塊巉手石頭都可以變成滑不溜手，我有信心自己都可以成功。」真人騷中的阿神是缺乏自信，懷疑人生也懷疑自己。
「跑步係好誠實嘅運動，冇捷徑，需要用雙腳去累積成果。古語有云讀萬卷書不如行萬里路。」保錡老師你好。
「我細個啲 friend 話讀萬卷書不如食萬寶路。」阿神街童式的回應，好鍾意呢啲反動思維二次創作 (另一經典是有頭髮邊個想食咖喱)。
「保錡幫我搵番呢一行嘅樂趣，人生可以有第二次機會，以前冇job時，起床唔知有乜嘢方向，而家可以去跑番個10K，會有好多想法，唱歌跳舞搞笑，好多可能性。」咁唔洗再食萬寶路。
不要放大困難原諒自己
有一集操練時阿神說對跑步有抗拒，跑步令他瘦，他做gym想build肌肉，不喜歡變瘦，加上唔夠瞓，膊頭又拉傷。教練在旁說跑步與膊頭關係不大，保錡覺得他搵藉口，其他人都冇出聲，氣氛好僵。阿神有少少發悔氣:「我係好廢，你哋唔明白我!」跟著發忟憎走開，不想講下去。
「保錡你果時係唔係好唔妥阿神?」
「係呀，我以前踢波，係運動場聽到好多藉口理由唔想操，我覺得係借題發揮。嚟得操就唔好放大呢啲困難。」保錡唔單止對付自己，也不原諒他人。
「我膊頭痛，係跑完至呻下，其實我睇左5位數字醫生想醫番好。我最唔想保錡誤會我扮痛搵藉口，我哋識左十幾年，大家係兄弟，呢樣嘢比我跑唔跑到緊要太多。」阿神強調他沒有原諒自己。
其實保錡好關照阿神同其他隊友，見阿神經濟不太充裕，著對藍球鞋板仔褲嚟跑，就送跑鞋送眼鏡送裝備等，又介紹物理治療師給他，又贊助Pony由屯門晨早搭的士去大埔跟操，好想他們努力跑，keep到團火，所以阿神最唔想令保錡失望。
「保錡表面係嚴父，其實鐵漢柔情，佢唔會兜口兜面讚你，係側面錫你，背後幫你埋晒單。佢係會教你釣魚而唔係俾條魚你果隻。」
整個訪問過程，阿神經常quote保錡金句和人生智慧，他們是brother，也是mentor同mentee。
甜言蜜語是危險毒品
「我知保錡對人harsh係想對方做得好，對人講甜言蜜語說話實啱聽，但未必會令人重新振作。」
「我覺得甜言蜜語好易成為一樣危險嘅毒品，廉價讚美唔會幫到一個人。反而令好多人迷失同自滿。『公司冇迫我跑馬拉松』好多人欣賞，讚我哋好辛苦付出好大努力，但比起職業運動員，佢哋辛苦過我哋一萬倍。我跟阿歹練跑步，佢以前踢波半途出家去跑步，經過努力操練跑到好成績 (渣馬2小時29分)，係值得欣賞尊重。」
「由artist拍一輯跑步真人騷，唔係拍佢哋跑得幾快，最重要係宣揚運動嘅正能量，同令人認識全職運動員嘅付出，這是我好想做到的事情。」保錡覺得真人騷也有使命和社會責任，不是單單娛樂觀眾同爭取收視。
「參加渣馬嘅跑手，真係唔好跑跑下攞手機出嚟selfie影相，唔好當係打咭活動，要尊重比賽和運動員。」保錡一臉認真。
神對付神
有一課操半馬，阿神又因膊頭傷患同太熱，去到13K左右 quit左上車。「其實唔想講俾人聽，人哋會話你搵藉口，真係唔知點做至可以符合到人哋嘅期望?」如此狀態和心態，旁人都擔心阿神怎去完成終極任務的台馬。
不過後期的操練，無論跟浩聰跑上飛鵝山操斜路、同盧巧音紅雨下跑青公、梁諾妍帶長課由清水灣道入西貢、柳爺 (柳俊江) 係大埔陀地領跑、阿歹黃尹雋名師用心陪跑指點，由1xK到3xK的操練，阿神從不缺席，亦用心用力去跟同完成，冇上車，信心同鬥志返晒嚟。
壓軸一集2男3女藝員到台北跑馬，可能唔太適應氣溫，阿神過20K後開始抽筋，他不停拉筋。3xK時更腳步搖晃，神智混沌，閉上眼在跑，工作人員在旁扶著他。大家都好想他趕得切過38K的最後CP，拼命鼓勵他。此時阿神接近崩潰，大叫:「我係垃圾，係廢柴!」是長期壓抑在內心鬱結的釋放。
阿神感覺大脾小腿都10級痛，倒在地上。但他沒有去哀求一個放棄的簽証。當聽見CP還有1分鐘關門，距離百多米，馬上奮力爬起，跌跌撞撞跑去，不幸仍過了幾十秒，望著工作人員緩緩拉上閘門，他垂頭喪氣上大會的車返回終點，會合其他都能完賽的藝員。
「當見到連5個半鐘嘅pacer都過埋我，我覺得自己好失敗。」
阿神，你力已盡，此刻你要原諒自己!
台馬後真人騷已拍完。2024年1月阿神在柳爺及數位大埔民間體育會的同學陪同下，在大埔沿吐露港跑一隻馬，嘗試再挑戰未完之任務。阿神穿上台馬件跑衫，掛上當日被蓋著DQ字樣的bib。但沒有ViuTV的crew跟拍，因這不是一場騷。
「點解台馬DQ後會再跑一次?」
「DQ上車後，我覺得好對唔止班兄弟同幕後，特別係導演，佢係想幫我俾人認識。我諗番起柳爺同保錡，佢哋會面對失敗，而我就選擇逃避，我要真正做番一次，唔洗要crew拍，唔洗有藝員陪，只要我隻錶打番42.195呢個數字出嚟就夠。」阿神用了5小時6分完成了人生的初馬，也圓了自己和媽咪的夢。
「阿神你嘅改變真係好大。」我記得他在真人騷講過，到目前為止未有一部作品俾人記得，經濟又有壓力，好sad好灰。
「我唯一俾人有印象嘅就係『全民造星一』，之後就人間蒸發。其實心裡面好唔開心。諗深一層冇人記得，即係自己做得未夠好。保錡話與其keep住唔開心，不如落手落腳去改變。要開始落街跑，至知點樣執靚個跑姿，用啱嘅裝備，至有機會成功。」佛系打救唔到你。
「拍show時好多人都離隊，阿神你一開始都唔係咁like跑步，點解唔加入逃亡大軍？」
「我睇番保錡，佢一年3百幾個show，又要拍廣告出歌，佢都頂得住去練跑，我唔會忙過佢，佢冇俾藉口自己，我都唔可以。」阿神開始對付自己。
阿神訴說:「一出世我阿爸走左，唔要我，我想成為一個男人，唔理屋企有冇自己一間房，戶口有幾多錢，我要人地見到我係個唔容易放棄嘅人。」阿神，你真係好鬼man!
對付自己才有機會等待果子
保錡說:「我同阿歹好friend，大家都係踢波。我19歲時踢預備組 (沙田)，好想成為職業足球員。但運動都要講天份，你好努力但冇天份，只能成為合格嘅運動員，但唔可以成為香港代表隊。我踢左閘，有次同外籍球員鬥攞身位，俾佢一踫就彈左出場外，其實果時我覺得自己已經係頂峰，我知我個level只能係呢度，好難再上，於是決定quit。」保錡這次選擇原諒自己。
「呢個決定難唔難做?」
「難㗎，果時我冇另一份job係手，係裸辭。跟住去考新秀。」
「你覺得自己可以做到娛樂圈?」
「我同其人諗嘢邏輯一樣，我見到陳偉霆得，我覺得我都得。」(補充資料，陳偉霆是2003年「TVB全球華人新秀歌唱大賽」勁舞台風演繹獎及自我才華表現獎。)
「保錡我記得你係真人騷時講過，人哋覺得你哋Error係4隻騎呢怪，你好似有啲唔忿氣咁?」
「唔係喎，幾忿氣喎。我自願搞笑，幾開心。我在嘩眾取寵中做好我嘅本份，做到小丑就係收穫。但在現實世界中我係一個堅毅不屈嘅小伙子，我在自己經營嘅instagram中去宣揚運動員精神，另一方面繼續做好音樂上嘅嘢。」
「我從運動中領略到無需太介懷別人怎樣看你，否則自己會好攰。因為人總喜歡judge人，我覺得鍾意去比較嘅人都係較為弱，這是我看到的人生智慧。」
「保錡阿神你哋今年都33、32歲，點睇今日嘅自己，滿唔滿意？」
保錡說:「今日我覺得係賺左。『造星』之前我哋做過好多份工，做過老臨係街sell過電訊plan，不過都堅持目標係演藝發展。」
「我條路係有啲崎嶇，我係『超級巨星3』(2011) 去到30強，入唔到20強。後來去左亞視做到執笠，跟住做物管同保安清潔女工打交道。我而家心靈滿足，但戶口仍然努力中。」在掙扎中的阿神，加油呀!
保錡的夢想
「以後嘅日子，你會唔會只甘於做小丑? 你有乜嘢目標方向?」
「小丑只係一個踏腳石，我希望可以成為張家輝，成為『化骨龍』嘅角色。」(張家輝在電影《賭俠1999》的角色，那些看港產片長大的80後，都會記得:「仆你個街，亞視嚟嘅喂!」)
「我想好似張家輝咁，成為一個有感染力嘅演員。我呢啲卅幾歲中佬，唔係sell白白淨靚仔樣。重要嘅係你曾經為社會做過乜嘢? 你做過好有貢獻嘅事情就係靚仔，你冇社會責任就係樣衰。」估唔到保錡咁有社會意識。
「每年好多演藝界嘅人玩渣馬，但大部份成績都遠低於及格水平 (以年齡比例計算)，我覺得一係唔玩，如果落場就要操練，起碼做到大眾的水平，唔好淨係嚟打咭。」
「保錡你係唔係屬於對付自己嘅人?」
「我絕對係對付自己，好鍾意對付自己。因為艱苦至可以成功。」
「艱苦完，果子好甜美。」阿神補一句。
「但果子往往好遲至出現，甚至唔一定出現，首先你要啃左啲艱苦先。」我挑機一句。
「係嘅，我諗我仲未嘗到粒果子，舊年我係有啲強顏歡笑，好迷失，人哋搵唔搵你做嘢係好被動，所以心理質素要夠好。」在星藝途上跌跌踫踫的阿神，不知何時見到果實。
「但運動好誠實，跑得多自然跑得遠，操得多你會科。」保錡鼓勵阿神。
「跑步之後我覺得心地都好埋，我比前孝順左。」阿神有冇吹大左？
「我上網做過research，跑步40分鐘，可以有幾個小時安多酚效果，仲多過吸毒，又唔洗錢。想俾人知道連保錡呢啲大埔路人甲都做到，即係每個人都做到。」
(大埔民間體育會 例二 大埔運動場fun run，免費加入)
不跟大隊的成長路
「阿神聽講你同阿媽關係麻麻?」
「自細同阿媽一齊生活，佢好嚴，唔係攬攬錫錫果type，當我考廿幾名，佢會讚考十幾名果啲，我同佢係火星撞地球。阿媽對我話你有本事就搬出去住，我讀大專時就搬左出去，我自己好想做出成績，俾人睇得起。」另一個情意結。
「阿神，你覺得自己為他人而活定為自己而活？」
「我係單親家庭長大，無論溫柔定harsh (明指保錡) 嘅愛都想要，我以前係為他人而活，所以介意人哋點睇。而家我大部份時間為阿媽而活，要搵錢番去，所以我恨錢」。
「其實我知阿媽係錫我，所以有時保錡對我harsh，我係feel到背後係一份限鐵不成鋼嘅愛。因為保錡經歷過，佢話我一定可以從地獄中走出嚟。」雖然好文青對白，但feel到那份真摰。
「娛樂圈好多人鍾意口沬橫飛吹到識飛，教你要點要點可以名成利就，自己就吃喝玩樂渡過人生，完全冇說服力。我覺得一定要身教，要自己先做到才去教人。我算係一個超有毅力同意志力嘅人，我想做的事情一定諗辦法做到。」保錡又老師上身。
「你講到咁有毅力，你當初點解唔堅持讀多啲書?」我見保錡好人至敢挑機。
「我小學考第一㗎，跟住入左英文中學。其實我唔係? 讀唔上，係我唔想讀。中三時我思考一個超勁嘅問題: 究竟學side angle side有乜嘢用? 返乜嘢工要用? 我諗唔到答案，於是中三轉左去一間專攻運動嘅學校，攞過學界足球獎。我目標為本，認為時間應該花在自己會發展的方向上。」
「我睇過日本當代藝術家村上隆嘅書，講如何將藝術商業化，村上隆的太陽花帶來震撼，可以發揮到巨大的影響力。我就係想去到呢個境界。」
「同保錡一齊，都要對自己咁harsh至會friend到。佢會將自己嘅準則加上去，跟唔到就會離開。」阿神說。
「大家會同番啱自己level嘅人溝通，不是分高低，只係同溫層法則。所以唔係紅左唔識人，因為大家有唔同嘅追求目標。」保錡對friend有要求。
「以前有個friend問我借400蚊，我覺得係件好On X嘅事，係fb炒散群組好易搵到5、6百蚊，保安洗碗part time隨時搵到1K，但佢唔去搵，反而選擇問我借，大家唔同一個level生活。」開口問人借4舊水，就是個原諒自己嘅人。
明白，如果未對付過自己，就唔可以原諒自己，保錡老師，對不對?
彩蛋 – 老臨的叉雞飯不易食
「拍左真人騷後，阿媽有冇對你改觀?」
「佢而家有睇我嘅節目，話我大個左，佢仲話保錡叻仔，叫我跟佢學做人，佢再唔係攞330蚊叉雞飯嘅保錡。」
「乜嘢330蚊义雞飯?」
「我同保錡做過老臨，揸住把膠刀，由2舊水4個鐘到3百3一日，另加一盒燒味飯。」
保錡回憶:「我最記得拍『重口味』套戲，陳偉霆做主角，我俾個導演當狗咁鬧，果陣我諗如果全民造星入唔到，以後就唔撈呢行，因為從19歲到26歲，我冇一個選秀節目入到。」
阿神說:「如果唔係呢個真人騷，我都有諗過摺埋心水返番去做物管，我已經考到物管經理牌，出嚟做會有3萬幾蚊一個月，我32歲，唔可能再返去選秀。」
「我好記得係片場時，導演叫我哋老臨係阿邊個邊個 (其實職場都係)，連助導、場記、燈光都呼喝我哋：快L啲，立立耐耐，淨係識拎住個飯盒。係片場我哋冇名，係食物鏈最低層。有一次拍『季前賽』電視劇，某個特效導演突然好關心咁問我: 阿神，你飲左水未? 我果刻真係滾動左，我feel到respect!」
大家記住係街見到阿神，就大聲問: 曾贊學，你飲左水未?
The post 應該原諒自己定對付自己? |《公司冇迫我跑馬拉松》保錡和阿神的真人對話 appeared first on Fitz 運動平台.