2000年代潮流回顧 周杰倫黑背心+Cap帽 E-kids式MK金毛+古著

Neway清盤，代表一個年代嘅沒落，想當年唱K係最潮嘅活動，尤其是2000年代，當年YouTube仲未流行，後生仔要去睇MV，通常都係靠唱K。而當年更流行過歌迷冒仿偶像於MV中衣著，例如著黑背心扮周杰倫，跟E-kids染金毛，雖然依家睇返真係有啲MK，但當年確實係潮，現在就同大家回顧一下。

撰文：拓海｜圖片來源：MV截圖、新傳媒

2000年代潮流回顧必著周杰倫黑背心+Cap帽

1.周杰倫 – 黑背心+Cap帽

當年周杰倫一出道就即刻爆紅，有唔少男歌迷都會模仿周董，如《可愛女人》 MV中黑背心+Cap帽造型，當年真係周街見唔少男仔咁著。

2.謝霆鋒 – 背心底衫 + 喇叭褲

講起背心，點會少得謝霆鋒，《活著Viva》當年可謂俘虜一眾樂迷。而霆鋒愛穿Deep Anger及Chrome Hearts，不過價錢有返咁上下，樂迷當年為求慳錢，會去女人街揾代朁品。

3.E-kids – 金毛+古著

E-kids絕對係MK始祖，開創咗一套MK式日本穿搭，不過當年MV《開始戀愛》中金毛+古著，其實都有唔少人模仿，而好多人特登去美芝揾MV中嘅古著。

4.B2 – Spice Girls造型

90-00年代Spice Girls大熱，當中跳舞造型大大影響當時潮流，而本地跳舞組合B2亦帶有少少Spice Girls影子，小背心+水桶褲，2000年代好多女仔都咁著。

5.陳小春 – Hip-Hop造型

雖然個人唔係好Hip-Hop，但陳小春有一段時間因應潮流跟風著Hip-Hop，如《啼笑姻緣》MV，而當年唔少潮人都會著Hip-Hop造型，而買Hip-Hop衫通常係去B-Sound或take it easy。

6. Shine

2000年代Shine絕對係潮流icon之一，唔少大男孩都會參照佢地打扮，如Lorry Cap當年一定必備，而且仲要側戴，就好似MV《俗》嘅造型咁。