【蟹季懶人包】：學揀靚蟹

踏入農曆九月，又係蟹季，如果閣下都係一名蟹癡，那就要留意由周三起一連5日嘅好介紹，包括教大家揀手靚蟹、劏蟹斬蟹、本地時令蟹款及食法等。無論係本地蟹定外地蟹（日本名蟹、西方靚蟹），想揀新鮮生猛靚蟹就要學以下幾招喇！

1. 食公定食乸

大閘蟹食蟹膏，無論係公定乸都有膏，分別在於黃澄澄蟹黃定實淨甘香嘅白油，大家可以因應個人喜好而於九、十月揀選乸或公來品嘗。古語有云：「九月圓臍十月尖」，即九月啱食蟹奄係圓（圓臍，即乸）、十月宜食尖臍（公）。至於一般嘅蟹，就睇個人喜好，蟹公偏向肉厚味鮮，而蟹乸一般就多膏一點。

2. 要精靈飽滿

想知蟹隻生猛與否，首先睇眼仔，無論源自何地嘅蟹，只要其眼及觸鬚不斷郁動，輕觸即有反應代表生命力十足，夠晒生猛，如果口吐白泡，千祈咪以為準備歸西，相反，咁只係證明蟹拼命呼吸，空氣同腮入面嘅水分吐出時形成氣泡，證明蟹隻新鮮。至於想知蟹肉多唔多，則要睇腳關節位，如果腳部粗壯、質感飽滿，代表肉厚。

3. 點樣洗白白

基本上，所有新鮮生猛嘅蟹買返屋企嗰陣，都會有繩綑住（有啲會用上棉繩或鹹水草），未劏前都千祈咪剪開條繩，熟手嘅就話一手捉住，新手就麻煩大，變成「倒瀉籮蟹」，有排搞！大膽一點，可以放入冰箱凍暈蟹隻才清洗，細膽一點如小編，直接開盆水，放入水浸一會後用一支舊牙刷幫佢刷勻全身即可。

4. 劏蟹小秘技

蟹隻洗完白白之後，如果大家選擇原隻蒸煮嘅就當然簡單得多，之不過，如果係薑葱炒、避風塘辣炒、醬油年糕煮、蟹粉絲煲等等都需要劏蟹斬蟹。斬時在蟹肚中間下刀斬，但不要切斷蟹身，之後將刀尖插入蟹口打開蟹蓋，在蟹蓋中間去除沙囊及蟹身兩邊嘅腮，之後才斬斷蟹身。緊接才斬開蟹鉗，拍碎外殼，於蟹腿之間斬件即可。