康復香港，時代抗疫／十大疫境抽水語錄　飯聚集團先第8名！

苦中作樂嘅創意　香港人笑吓啦

幾時都話香港人好有創意，就算面臨逆境，都一樣有打不死嘅精神，繼續苦中作樂。呢段日子以嚟，相信好多香港人都好大壓力，而家爆發疫情，無論你嘅政治立場係乜，呢刻最重要嘅都係做好防疫措施保護自己，同時保護其他人。疫情爆發後，討論度最高嘅除咗係搶唔到口罩之外，仲有發生唔少事成為大家話題，以下DailyView為大家調查咗呢十個語錄你又係咪全部都知道晒呢？

DV小教室：網路溫度計透過《KEYPO大數據關鍵引擎》，觀測、爬梳港澳地區近萬個網站、頻道，其中包括新聞頻道、各大討論區、FB、IG以及Blog，從中取得資料樣本數，並以AI語意程式作數據分析。「網路熱度」為主題項目相關的網路posts和comments ，數值愈大代表主題項目的討論度愈高。

10 行山銀行（1902筆）

呢排大家都盡量避免出入人多嘅地方，加上唔少人有工冇得返，突然間捲起咗一股行山熱潮。行山銀行嘅出現係因為有六個恒生銀行嘅培訓生被揭發喺Home Office期間相約行山，本身Home Office就係要大家留喺屋企自我隔離同時繼續返工，呢幾位培訓生擅離職守仲將合照放上網，後來就當然被高層追究啦，行山風氣越吹越勁，行山銀行就成為網友講笑嘅新詞。

9 炎症執法（2399筆）

由反送中運動開始之後，警察同市民嘅關係急速惡化，慢慢演變成勢不兩立。警方多次強調佢哋公正嚴明咁執行職務，呢啲言論當然引來好多市民嘅不滿。近日有其中一名防暴警被確診肺炎，唔少市民就即刻抽水用個諧音講：「香港警察，炎症執法！」用嚟諷刺返警隊。更有人話今次香港警察終於變成「武警」，亦姐係「武漢肺炎警察」。

8 飯聚集團／飯聚分子（2633筆）

因為疫情影響，大部分人都提高警覺避免聚會，就算一家人一齊食飯都要用公筷，減低傳染風險。不過一個警察確診之後被發現曾經出席一個60人嘅「飯聚」活動。坐埋一齊飲飲食食，談笑風生，過程如果冇戴口罩，困喺一個密閉嘅環境入面，真係好容易成為傳播病毒嘅高危地方。曾經出席飯局嘅其他警員都疑似出現病徵，令大家都好關注呢單嘢。

7 官狀病毒（3441筆）

出現病毒導致全球人心惶惶，唔止亞洲地區，就連歐美國家都一樣出現唔少確診病例。本身爆發疫症都可以算係天災，大家都唔想發生，不過如果後續安排防疫工作做得唔好，就係人禍啦。爆發疫情之後，好多人都不斷要求政府封關，以減低病毒入侵本港地區嘅機會，但政府官員遲遲唔封關，搞成依家呢個局面，引嚟市民不滿，於是就被稱為官狀病毒。

6 有政府，唔驚！（4229筆）

疫情爆發之後，全世界都搏命搶口罩，搶消毒用品，唔少人冇口罩連街都唔敢出，不過都有少數例子憑住個信念話自己乜都唔驚。早前廣州幾個市民接受採訪時話：「相信政府」、「有政府就唔使驚」，連口罩都唔戴就可以「身體健康」、「年年有今日」。喺全部人膽戰心驚、擔心中招嘅時候，呢幾位市民向大家展示咗佢地嘅積極樂觀嘅態度，段片同截圖好快就被瘋傳，大家笑完就算喇。

5 康復香港，時代抗疫（4532筆）

「光復香港，時代革命」呢八個字相信大家喺呢大半年入面聽咁多次，絕對唔陌生。不過一單未完又一單，反送中運動仲未告一段落，依家又爆出武漢肺炎，呢八個字嘅經典口號亦都被改成「康復香港，時代抗疫」應景。由2019到2020年而家香港人真係經歷咗好多事，希望疫情快啲有好轉，大家都唔使日日戴住口罩，咁營營役役過日子啦。

4 邊爐家族（6009筆）

香港人最鍾意就係打邊爐，一班人圍埋一齊烚吓烚吓夠晒熱鬧。不過疫情之下，打邊爐呢啲容易傳播飛沫嘅活動，好多人都敬而遠之。
咁又係嘅就算有用公筷，大家食嘢除晒口罩，圍埋一齊講嘢，都有可能令飛沫進入煲入面，有咩事真係一鑊熟。呢單24歲男子同屋企人打邊爐，到後來全家都幾乎中招就係一個好例子喇。

3 蒸口罩（17362筆）

蔣麗芸議員提倡蒸口罩，唔少香港人都得啖笑。事源有中國嘅傳染病專業博士出嚟話蒸口罩可以有效殺菌，蔣議員信到十足十，喺Facebook分享話：「高溫蒸汽消毒口罩可以殺菌」，口罩可以再次使用。即使後來喺立法會會議上俾專業人士多次反對蒸口罩呢個做法，話唔可行，蔣議員一於小理，繼續堅持己見，不過相信各位香港人都已經見怪不怪。

2 最緊要人有事 （19490筆）

通常發生意外，我哋最常講嘅就係「最緊要個人冇事」，而「最緊要人有事」呢句說話出現係因為警察確診令大家抽水。防暴警察確診之後大家都開香檳慶祝，香檳甚至賣到斷晒貨，足以表達市民嘅心情。
呢一年警民關係越嚟越差，市民對警隊嘅不滿有增無減，喺反送中運動入面，警察好多行為都令香港市民憤怒，於是同警察嘅對立就越嚟越強烈。所以一爆出警察中招，好多市民都一齊講呢一句：最緊要人有事。

1 2盒thx （54907筆）

口罩賣到斷晒貨，好多人排幾個鐘都只係為買返幾個口罩，不過就算排咁耐都未必買得到㗎。唔少公司，網店都上網開post賣口罩，喺一片口罩荒之下，大家一見到基本上就即刻留言先，唔理三七二十一，總之搶咗再算。呢種「2盒thx」嘅留言，就成為大家講笑嘅口頭禪。不過因為口罩一個難求，大家一聽到有口罩賣都好緊張，有唔少黑心商人都睇準呢個機會，聲稱有口罩賣然後要大家先過數後取貨，利用疫情呃錢，大家都要特別小心啦。

【香港網路溫度計調查結果之圖文，未經授權請勿轉載、改寫】

分析說明：

本研究資料由《KEYPO大數據關鍵引擎》提供，分析時間範圍為2020年01月01日至2020年02月25日。

網路大數據系統觀測港澳地區上萬個網站頻道，包括新聞頻道、Facebook、Instagram及各大討論區、BLOG等，針對討論『武漢肺炎後出現嘅gag』相關文本進行分析，並根據網友就該議題之討論，作為本分析依據。

本文分析之結果，非參考投票、民調、網路問卷等資料，名次僅代表網路討論熱度大小，不代表網友正負評價。