要追梗係追新色 YEEZY BOOST 700 Mauve
如果用「話題人物」形容Kanye West相信都無咩人會有異議，佢對時裝設計有冇天份？相信大家睇咗咁多季YEEZY SEASON都有目共睹，但佢對於「製造話題」的確係有一手！識得定時定候運用社交媒體去為自己所設計的波鞋保持話題性，當你以為人氣及炒價同樣滑落的YEEZY BOOST 350 V2已經再無討論價值嘅時候，佢早前又失驚無神帶埋老婆同個女走去非洲國家烏干達，拎大量Cream White送畀烏干達總統及當地兒童，畀佢成功喺潮流、娛樂及政治層面呃到人氣。
當你見到Cream White不停Restock啲貨多到拎去烏干達行善派街坊嘅時候，你就應該要知道係時候收手無謂再追YEEZY BOOST 350 V2，要買就梗係買近期大熱兼且Kanye West同老婆Kim Kardashian頻頻上腳嘅YEEZY BOOST 700。上月OG配色錯過買唔到唔緊要，因為今個星期又有YEEZY BOOST 700 Mauve配色登場，鞋身採用啡、黑麖皮及優質皮革打造，並配上灰色網面底層，保留反光鞋踭及三間細節點綴，加埋內藏全掌BOOST中底提供最舒適的腳感。發售細節與上回OG配色一樣，只要凡年滿13歲及持有有效香港居民身份證的香港居民，即可於即日至10月24日上午11:59前登入https://reg.adidashk.com/ ，就可於網上登記預購YEEZY BOOST 700 Mauve（須受條款及細則約束）。