早有共識不婚不育 阮兆祥與女友相愛18年

聽日就係母親節喇，唔知各位藝人又會點過呢？今個星期二梅小惠就喺社交網上載飯局靚相，連同藝人阮兆祥、江欣燕及陳彥行等人，約埋佢哋一大班媽媽飯敘，一同慶祝母親節！除左合照之外，相中見到佢哋送花之餘又換禮物，氹得媽媽們都眉開眼笑，好有愛呀！

撰文：Leo Fu| 圖片：Facebook、Instagram、新傳媒資料庫

飯局除咗媽媽們之外，入行超過27年的阮兆祥仲帶埋女友Crystal出席，唔知女友會唔會呷醋呢？事關阮兆祥同小惠幾十年嚟都一樣老友親密，以前曾聯名買樓，更講過「50歲未嫁人就娶佢」。

最親密的朋友

不過，阮兆祥亦解釋過佢同小惠之間只係親人之間咁老友，更因此同女友開過個玩笑𠻹：「如果我實踐50歲娶小惠嘅承諾，記得小惠做大，你做細。」小惠亦開玩笑地提過「佢（阮兆祥）一日未結婚，我都有機會，如果佢結婚，我就搵個垃圾嫁咗佢算」，真係唔知佢哋講真定講假呀！

阮兆祥與女友 愛足18年

唔講唔知，原來阮兆祥同佢女友Crystal已經愛情長跑咗18年，至於幾時先拉埋天窗，阮兆祥曾自爆早就同女友講好不婚不育：「未拍拖之前，我問佢，如果唔結婚介唔介意？佢話唔介意，我再問唔生小朋友介唔介意？佢話唔介意，然後我先話咁我哋可以拍拖喇。」

「我見證好多身邊嘅人結婚，又離離合合，但我身邊依然係Crystal，即將踏入第17年，大家相處得舒服就得。」原來大家已經早有共識喇！阮兆祥亦提到佢哋「咩都會講出口」、「唔使估估吓」，大家性格相近、坦誠相處，就係佢哋關係長久嘅關鍵吧！

不過，關係長久都唔代表冇爭執嘅，事關18年都唔有咁耐熱戀期啦，阮兆祥亦大方分享佢哋嘅相處之道：「依家當有意見不合，一感覺到大家啲火嚟緊，講嘢開始有啲骨，就會行開吓，等大家冷靜返落嚟，啖氣落咗就無事。」大家默契咁好，如果係相處得咁融洽，的確結唔結婚，都只係儀式嚟啫！