宋祖兒復出後首劇未播先爆是非　合照被18線女配打格仔

內地女星宋祖兒夥拍小生劉宇寧主演劇集《折腰》大受歡迎，總流量衝破8億，帶挈兩主角人氣急升，今年4月先成功擺脫稅務風波而「復出」嘅宋祖兒，更被睇好將攀上頂流之位，而佢「復出」後首客串演出嘅劇集《聊齋·聶小倩》最近亦開始宣傳，不過就被劇中18線女配角將二人合照打格仔，事件愈發耐人尋味，更引嚟逾1.3億人關注。

尋日（20日）《聊齋·聶小倩》單元演員周靜波發布煞科合照，圖中宋祖兒臉部及全身被打格仔，其他演員均正常出鏡。本劇為單元劇模式，宋祖兒僅客串「樹妖姥姥」一角，戲份已結束。網友一睇即刻𢱑晒頭，紛紛留言質問周靜波，佢一直未解釋打碼原因，但關閉社交網評論區，部分網友認為此舉加劇猜疑，認為佢嘅做法非常唔尊重宋祖兒。

網友分析多人合照僅對宋祖兒打格仔，被指針對性過強；若涉及保密，應直接裁剪或換圖，而非保留打碼痕迹。周靜波作為新人演員，此舉疑似借宋祖兒熱度博關注，話題發酵後，其知名度顯著提升。不過宋祖兒劇中造型路透早已被曝光，打格仔必要性存疑，而且周靜波同時發布其他演員未打碼合照，邏輯不自洽。

宋祖兒於2023年曾陷稅務風波，因被實名舉報逃稅而令當時拍攝中嘅新劇無限期擱置，宋祖兒事業停擺，直至2024年先澄清無違法，有網友估計周靜波可能為避免連帶爭議而將其打格。

東網網站 : https://on.cc/東網Facebook專頁 : https://www.facebook.com/onccnews/