上班日打8號風重溫黃子華金句 「我打邊爐都打得耐過你」

熱帶氣旋尼格逼港，天文台今早（11月2日）表示考慮在正午12時至下午2時之間發出8號烈風或暴風信號，最後天文台在下午1時40分發出八號熱帶氣旋警告信號，至少維持至今晚6時。大批市民不滿天文台改掛八號風球的時間及決定飄忽，早上仍要出門上班，紛紛在天文台的fb洗版，批評天文台罔顧市民感受。

不少網民到天文台的官方Facebook批評懸掛8號風球時間安排：「橫風橫雨返兩三個鐘，之後再橫風橫雨下返屋企，天文台好嘢…」、「個個都住喺公司隔離？有冇考慮過人住大西北返觀塘嘅感受？」、「講中咗，今次真係遊車河，啱啱先返到公司」、「點解1點40分咁exact呢？一時好vague日間時候」、「可能是國際金融峰會未完，要等埋金融峰會完先掛，合理做法」……

每逢打風日子都會網民重溫黃子華的棟篤笑金句，在2006年《兒童不宜》talk show中，子華神講到打工仔期待打風唔使返工，仲約人打通宵牌，點知朝早6點改掛3號，冇得瞓仲要返工真係人都癲！「人又打風你又打風，你打得嗰幾粒鐘，我打邊爐都打得耐過你！」

其他子華神的打風金句包括：「你有邊個風球覺得自己打得好嘅，舉一舉手！」、「一個每日理想都係想打風嘅人，又點會覺得慚愧呢？」、「有乜嘢快樂得過，你明知聽日要返工，而你聽到天文台講，現時3號風球現正懸掛！」、「稍後可能會懸掛8號風球，你即刻會變咗做馬迷，8號！8號！8號！8號！」。