當一段關係走到盡頭，過去一切都變得再無意義，世界頓時多了一個陌生人，殘酷但真實。阿Cloud嘅新作正以此為題，用歌聲充滿力量地訴說傷感。
「鋪於街區的牆 剎那會塌崩 安於喧嘩的蟬 太似告急」
歌詞第一段已經相當有畫面，營造出一種淡淡嘅淒慘，帶大家進入情緒。同深愛嘅人分開，個種剎那湧出嘅孤獨感絕對畢生難忘，彷彿失去所有寄託，世界再無希望。明明自己一心一意付出所有，甚至視對方為終身伴侶，可惜到最後先發現所有事只係一廂情願。
「而浮雲在日後伴你生日 但我沒有心 沒有力掛心」
傷心過後，我地只可無奈面對現實，當習慣有愛人在旁，生活同性格難免比對方影響，逐漸失去自我，連自己都變得陌生。霎時要重新學習孤身一人，又談何容易？不過我地無力改變分離事實，多艱難都必須要振作地走日後嘅路。
「是我們珍惜至今 離散時方知太笨 難過但必須轉身」
愛情嘅開初就係兩個人由陌生走到親近，然而到離別一刻，彼此卻會一下子打回原形，甚至變得更陌生。相戀時多轟烈動人也好，現在已經再不重要。
有趣嘅係，儘管情路上分分合合，傷過痛過無數次，但人依然渴望能夠搵到一個可以付託終生嘅陌生人，愛情就係有如此神奇嘅魔力。
「然而在盡力後力有不及 像結伴喪生 但各自再生」
《世界多了一個陌生人》同阿Cloud今年其他作品一樣，我都相當喜歡。佢開始平衡到自己嘅特色同大眾口味，亦受到更多樂迷喜愛，成功打入叱咤我最喜愛女歌手八強，相信對佢嚟講係一個好大嘅肯定。
「過路人遇過路人幻想一起一生 然後你忽然陌生 世界兇狠」
雲姨出道後一直用作品說話，將自己把靚聲完美地運用，帶嚟一首首佳作。今年絕對係收獲豐富嘅一年，期待嚟緊頒獎禮可以有好成績！
「為愛情天真至今 誰相信幸運 祝我幸運」
你嘅世界又有無一個最熟悉嘅陌生人？
《世界多了一個陌生人》Cloud 雲浩影
作曲：Daniel Toh
作詞：周耀輝
編曲：Daniel Toh / AF
監製：AF / Daniel Toh
「很想演出一場 兩個去跳的
終於只得一人 獨行如確幸
浪漫是亂性之物
付上青春將青春證實
然而在盡力後力有不及
像結伴喪生
但各自再生
為愛情天真至今
完美時走得太近
沒理由都可發生
從一剎靜默 一切靜默」
▼Follow hkpopculturelover
Instagram: https://www.instagram.com/hkpopculturelover/
留言 0