想要有完美嘅身型，越嚟越多人會用唔同嘅減肥方式，相信大家一定聽過「168斷食法」，要喺一日24小時內禁食16小時，只可以進食8小時，但呢個方法未必人人都可以堅持落去！但大家唔使灰心，因為最近網上興起「 422飲食法 」，唔單止比168斷食法更加溫和，一個月瘦4公斤更加唔係問題啊！想知呢個方法有幾神奇，快啲繼續睇內文啦！

圖片來源：網絡圖片｜撰文：Sharon

422飲食法原理

442飲食法係控制飲食喺黃金10小時內，以「4小時、4小時、2小時」嘅分段時間內，將所有食物食完。第一餐同第二餐中間需要互相隔4小時進食，第二餐同第三餐隔再隔4小時，但記得第三餐盡量進食輕食為主，仲要2小時內消化完成添！喺黃金10小時內進食，可以減慢胰島素分泌，使血糖水平下降，降低脂肪合成，再利用運動增加肌肉，提升基礎代謝率嚟達到瘦身效果。

422飲食法 – 飲食建議

442飲食法建議大家食2次正餐同1次輕食，當中包括1/4蛋白質，如豆漿、黑豆、肉類、蛋、魚；1/4澱粉類同1/2蔬菜。第三餐輕食以液體為主，可以飲豆漿、牛奶同清湯等。其餘14小時以飲水為主，1天飲約10杯，每次約200毫升，每日建議攝取2,000毫升嘅水份～

另外。控制醣類攝取量都非常重要，進食過多嘅碳水化合物食物會容易令血糖上升、脂肪堆積，加上活動量少會容易引致肥胖。因此，建議大家減少食白飯、白麵包等碳水化合物，每餐總量唔好佔多於1/4啊！

422飲食法 – 運動建議

每星期一至兩日起身後可以空腹做低強度帶氧運動，例如慢跑、游泳等，利用脂肪去燃燒熱量，有效幫助減脂！溫馨提示，如果做運動嘅過程中有唔舒服或者出現低血糖嘅情況，唔建議大家做空腹運動。

除咗做低強度帶氧運動外，每星期做2次重量訓練則有助增肌，運動後飲返一杯450毫升豆漿嚟補充碳水化物同蛋白質就啱晒啦！

喺飲食控制下，再配合適當嘅運動，短期內有效減肥都唔係一件難得，有興趣嘅朋友不妨一試啊！