日本係極愛貓嘅國家，唔少日本人屋企都會養喵星人，喺日本有好多小島嘅居民逐漸搬走，留底一啲家貓、野貓喺島上。
島上嘅喵星人一代一代咁繁殖，漸漸就佔領咁成個島喇！呢啲島雖然無咩人，但係就係貓奴嘅天堂！小編精選5大貓島，每個都各有特色㗎！
1. 愛媛縣青島
位於日本四國嘅青島，係日本有名嘅貓島之一，島上居民唔多，只有10~20人，但喵星人就多達100隻以上，完全係名符其實嘅貓島！
呢個貓島居民唔多，亦都無咩觀光景點，但貓貓就隨處可見，而且唔怕人，可以同佢哋近距離接觸～
青島嘅名聲早已喺貓奴之間傳播開去，好多人都慕名而來。
2. 宮城縣田代島
田代島係日本多個貓島中最大嘅一個。以前島民以養蠶製絲維生，為趕走蠶蟲嘅天敵──老鼠，都會養貓。
而島上更有一個供奉貓神嘅貓神社，相傳昔日漁民會透過觀察貓嘅行為預測天氣而決定出唔出海捕魚。
一日，一位漁民發現一隻被岩石砸死嘅貓，並將佢好好安葬，之後那位漁民竟然行大運，連年漁獲豐收，漁民都認為係貓神眷顧，所以就設貓神社供奉貓神。
3. 神奈川縣江之島
江之島最近東京，由東京搭電車過去只需要個半鐘，係交通最方便嘅貓島。
江之島嘅人流比較多，因為島上有唔少嘅觀光景點，包括燈塔、神社等等。
同其他日本貓島相比，江之島觀光旅客嘅數量非常多，少咗一份寧靜感，但勝在交通方便，而且島上景點多，可以順便遊覽埋～
4. 香川縣男木島
男木島最特別嘅地方係島上除咗喵星人之外，仲有好多藝術品可以欣賞添！
男木島係日本瀬戸内國際藝術祭2016的會場，所以島上有十幾件藝術作品包括壁畫同裝置藝術。
你可以喺喵星人嘅陪伴下欣賞一下島上嘅藝術作品。
5. 香川縣佐柳島
佐柳島同樣都係位於香川縣，而呢座島較為特別嘅地方係島上嘅貓咪都比較活潑。
喵星人活潑嘅原因係島上有好多石壆，唔少貓貓都會喺石壆上面左跳右跳，所以呢度嘅喵星人活動量都好大㗎！
呢5個貓島各有特色，但同樣有咁多可愛嘅貓咪等住你，對於鍾意貓貓嘅人嚟講簡直係天堂啊！
Text: Holiday Editorial
（小編公告：如果讀者有任何關於美食、旅遊、玩樂、或者任何新奇有趣事物既資訊，都歡迎話比小編們知～大家可以透過Facebook inbox、或者send e-mail到holiday@presslogic.com，直接將資料傳比小編）
留言 0