68歲陳百祥現身警總 為警員打氣：「份工好難撈。」

繼同樣68歲的譚詠麟以及66歲的鍾鎮濤早前出席撐警活動上台發表偉論，68歲的陳百祥雖然當日未有到場，但剛剛昨日(10日)就到警察總部，發表撐警言論。三人加埋超過200歲，都依然落力撐警，真係有心。

今日網上流傳的影片，就看到陳百祥現身警總，據說昨日警察總部安排奶茶飲品慰勞警員，而陳百祥就現身對在場警察說：「我好佩服你哋，可以喺咁艱難嘅時間，咁屈辱嘅情況下，大家可以保持到你哋嘅專業精神。」亦說到明白警員是應該「唔知點做」：「如果你哋俾我做決定，我都唔知點做，只可以堅持自己當差嗰陣時，係想呢個社會有正當嘅紀律，有合法嘅嘢，你哋只不過做番自己嘅本份，不過而家呢份工係好難撈，所以我只可以做到嘅，係同你哋打氣，因為我覺得正常嘅香港人絕對係同我一樣諗法。」之後在場警員都拍掌歡呼，圍埋一齊好歡欣。