【方以文問兩句】受姜濤與AI啟發　尹光：唱歌50年送自己一份禮物

做前輩最正係玩得又肯試新嘢，咁先可以將寶貴經歷經驗用唔同方法呈現出嚟，呢方面一向難唔到尹光！3個月前有人用A.I.模仿光哥把聲去唱姜濤《Dear My Friend》造成話題，兩段片喺YouTube至今分別有37萬同28萬views，用光哥把歷遍滄桑嘅聲去唱呢首歌，有種麻甩佬一支公喺大排檔隊啤酒懷緬老朋友嘅感覺，好感觸感動 🥲 以為光哥最盡都係真人cover一次首歌嘅時候，點估到佢會行多幾步，用《Dear My Friend》同埋A.I. 去做新歌《Dear Myself》?!

光哥：「當時呢啲A.I.歌咁hit，令我同公司都諗不如試吓自己挑戰做一首抒情歌啦。而姜濤呢首《Dear My Friend》本身我自己真係好鍾意，非常感動。佢首歌充滿住佢嘅故事呀嘛，所以受到佢嘅啟發，我就不如做一首屬於我自己故事嘅歌啦。同填詞人阿檸薛晉寧傾嘅時候呢，都覺得叫《Dear Myself》係最貼切，算係我自己唱咗50年歌，送畀自己嘅一份禮物囉。」

呢首歌同光哥招牌玩嘢風格好唔同，好深情。「本身我唱咗咁多年歌，都以為大家只係鍾意我唱啲諧趣呀、搞笑嘅歌。咁我要多謝啲AI歌嘅提醒，令到我自己都要挑戰吓，唱吓呢啲港式抒情歌，咁呀希望大家鍾意啦。我好鍾意呀，仲要將啲招牌經典歌好似《十四座》、《荷里活大酒店》、《數波波》放埋落去，好感動。」

首歌仲加埋A.I.元素入去。光哥之前做訪問時話A.I.唱歌唔夠感情，依家又有冇唔同睇法？「依家啲A.I.真係愈來愈厲害呀，已經做到即時變聲。嗱，阿慈即刻變咗我把聲同我唱《少理阿爸》，幾過癮喎，用嚟玩吓大家開心吓就好喇。但係講到真係唱歌，點都冇真人嘅聲咁好感情嘅。」

除咗新歌，光哥即將喺11月4日喺紅館開演唱會。今次個poster造型亦都好正，係shocking pink！「今次呢個演唱會，將會帶大家去到一個屬於尹光嘅宇宙裡面，無論造型啦、選曲啦、編排啦，都會有啲唔同嘅新嘗試。同埋都會加入一啲最新A.I.科技元素，大家記得買飛嚟支持吓喇！」

由張子丰執導嘅新歌《Dear Myself》MV上咗YouTube有11日，view數超過42萬！首歌寫住feat. Wan.K。Wan.K係光哥嘅新名？定係A.I.個名？「Wan.K係我英文名嘅縮寫，亦都係可以解作係一個尹光嘅精神，入面係有好多無限嘅可能性。」

撰文：方以文