新年樓下保安又開始精神 教你4招如何避開保安攻勢！

「年~又過年」，新年又到，又係時候開始問親戚朋1友逗利是嘅時候。不過一到此時，你住的大廈樓下嘅保安都會開始精神，你會開始莫名見到一啲未見過嘅保安，唔知由邊度嚟嘅保安隊長等等，今番筆者教大家如何避開保安，唔使派咁多利是！

新年樓下保安又開始精神 教你4招如何避開保安攻勢！

1.搵到相熟保安即刻衝埋去先入為主

相信身為有禮貌嘅香港人，平時都一定會對自己樓下嘅保安打招呼，唔多唔少都會認得佢哋嘅樣。呢個時候一落樓見到成班保安準備衝埋嚟恭喜你嘅時候，試吓先入為主，入佢中路，直衝相熟保安度再講聲恭喜發財，然後再塞封利是俾佢，最後用趙雲七進七出嘅技巧全身而退，完美！

2.拖字訣

拖字訣呢招雖然陰濕，但係其實十分有用。每次落樓見到保安開始湧上嚟，就即刻厚面皮再加啲劉德華演技講聲：「哎呀！唔記得帶利是落樓！」，順勢用Michael Jackon Moon walk向門口方向移度，呢個時候最好口中再伴隨著：「走先啦係咁先啦，下次再派啦」，目的係教班保安多啲支持廣東歌。

3.疫情之攻勢

依家香港疫情相當嚴重，每個人對於染疫都十分擔心。可以試吓帶定利是，當保安開始展開攻勢之時就起勢咁咳，咳到個肺好似就嚟甩咁就最有用。當佢地一呻手之際你就一路咳一路拎利是，佢哋一定會避而遠之，連拎都唔敢拎，即慳幾封！

4.成本降低大法（最終秘技）

如果你對於以上方法都比較唔想做的話，就唯有用成本降低大法了。呢個時候你需要幾種唔同嘅利是封，而唔同利是封入面嘅裝住嘅金額都唔同。而保安個幾封就….你哋自行根據財力去決定吧！又唔可以太少唔可以太多，呢個拿捏位唔係咁易，不過咁大個人要掌握吓！