MC喺年初稍作休息後，推出新專輯《TREBLE》。除咗去年六首派台歌，仲收錄足足四首新作，接下來等我簡單介紹一下。
「像 一陣風 將思念都帶走 在這浪漫時空 你 你是否感受 我的感受」
《September with You》唱出愛上一個人時，眼中腦海都只有對方既心情。即使純粹幻想彼此相處，心中依然感到浪漫甜蜜，一心一意希望可以走近再發展，有點台灣偶像劇歌味道。
「沒法子聽你笑 掩起了我雙耳 寂靜不過如此」
同愛人分別後，即使裝作不聞不問，毫不介意對方一切，但其實內心仍然在乎，多痛苦都強忍好奇，刻意保持距離，讓自己可以早日抽離依段感情。《隔牆有耳》唱腔相較平淡，但收起爆發力令情感更細膩，堅強中帶點心酸。值得一提係歌曲結構工整，主要以六字為句，聽落有種一氣呵成又連貫既感覺，非常特別。
「是誰讓我哭過 來沉默安歌 如可將舊時熟識的章節徹底重播」
《七點半鐘的陽光》講出一個與陌路人既故事。即使並不相識但已暗暗愛上，每日等候依個人出現，好想可以安撫傷心既對方，可惜一切只係空想，無可能開花結果。作品演繹成熟新鮮，編曲入腦，歌詞更充滿畫面。談情以外又有點弦外之音，就好似形容緊生活喺依個城市既每一位。
「或許再抽根煙就可以給我多點時間 或許再見一面我可以兌現全部諾言」
《Butterfly》同MC一貫風格相當唔同，Indie味重，編曲複雜又吸引，混合三種語言三把聲都完全唔突兀，仲更有層次，一開聲已經充滿力量，型格瀟灑地表達出分手後既感覺。
「無人可比你好」
整張專輯內容豐富，橫跨不同風格、題材、語言，記錄咗MC既成長。四首新作都相當高質，聽咗一星期依然回味無窮，越聽越有味道，亦比大家一個機會重溫舊作。
MC唱所謂「大眾情歌」一向都有種吸引力，可以將歌曲既揪心唱入內心，令人感同身受。同時佢又好願意做獨特既新嘗試，平衡不同樂迷口味，屢屢帶到驚喜比大家。
「如天早注定碰上你 才顯一切值我銘記」
出道幾年間，張天賦已經完成一個個里程碑，但佢仍然不停突破自己，作品亦保持高質素，實在係樂迷福氣，期待佢今年再做更多佳作。
最後，《TREBLE》實體唱片設計得非常用心，大家有興趣記住買返隻！
《TREBLE》 MC 張天賦
1 與我無關
2 花海
3 September with You
4 隔牆有耳
5 永久損毀
6 抽
7 七點半鐘的陽光
8 救命稻草
9 第二人格
10 Butterfly (feat. Hei-Z 希晉 & Kwan.T)
▼Follow hkpopculturelover
Instagram: https://www.instagram.com/hkpopculturelover/