跌巿撞正丁蟹掟仔32周年　導演吳煒倫：丁家年少日記

港股今日（10月8日）大冧巿，一度跌逾2300點，《毒舌大狀》導演吳煒倫發現經典電視劇《大時代》中，丁蟹因炒股超蝕而導致傾家蕩產，在港交所天台，逐一推4名兒子落樓的日子，正正是32年前的今天。

吳煒倫於社交平台貼上《大時代》的經典場面，丁蟹推仔落街一幕，畫面正正顯示，「10月8日10:00AM 香港交易廣場天台」。他寫道：「32年前丁家年少日記」，更標籤「#10月8日 #都係老豆喇」。有網民即時回應：「又係10月8日?」、「邪到咁緊要」、「真。我推的孩子」。

1992年放播的《大時代》一劇以股票市場為主題，由鄭少秋飾演的丁蟹面對大跌巿一幕，令不少觀眾留下深刻印象。而自該劇播放以來，每逢有鄭少秋擔崗的劇集上映時，同一時期的香港股市就會恰巧出現跌巿，所以被觀眾稱為「丁蟹效應」。想不到連劇中情節的日子，亦與現實跌巿日撞期。

導演吳煒倫早前觀看電影《小丑：雙瘋》（Joker: Folie À Deux）後，更提到 Joker 自辯一場戲，不及《大時代》丁蟹的那一場，相信吳煒倫亦是神劇《大時代》的忠粉。