20歲許恩怡披母親柏安妮戰衣　出戰武術錦標賽橫掃4金

柏安妮女兒許恩怡（Natalie）今年20歲，入行3年多，2021年憑電影《燃野少年的天空》奪東京國際電影節「最佳新人獎」，去年在《但願人長久》扮演吳慷仁女兒。外表嬌滴滴的Natalie，自小接受舞蹈與武術訓練，最近參加「2024加州國際武術錦標賽」長拳、五步拳、24式太極與自選劍4項比賽，披著母親的武術戰衣出賽，最終全部奪冠，橫掃4面金牌。

Natalie早於小學已開始習武，之後加入校隊。「今次決定參加『2024加州國際武術錦標賽』係好突然嘅，因為已經幾年冇練習，喺好近報名嘅時候，我同老師聯絡，見咗一次後決定要報名，跟住我就日日喺屋企練習，因為我覺得唔日日練我嘅體能唔夠好。不過我發現其實有個底好快就會pick up返，我都唔知我原來仲記得啲動作，當要做嘅時候就出晒嚟。」

比賽當日，Natalie身穿的黃白色武術服，原來是母親柏安妮的武術戰衣。「本來媽咪喺疫情前諗住去新加坡參加武術比賽，但係因為疫情所以去唔到，所以呢件黃色嘅服裝其實係佢嘅，我就話啱啱好喎！」

能夠一次過在4個項目奪冠，Natalie被問到會否學以致用，向武打電影邁進？「有機會我當然好想做！但係我都驚自己未夠好，其實我打嘅武術同武打片嗰種打法好唔同，雖然嗰種打法我係一路都好想學，希望我武術嘅skill可以幫到我，而電影武打訓練都好重要，最好加埋有靚仔對手，或者成班cool girls就好有型。」

經歷比賽後，Natalie體會到太極與劍術博大精心之奧妙：「大個咗識得欣賞太極嗰種慢，好珍惜呢五分鐘，等自己平靜落嚟，唔單止對身體好，短短嘅時間入面仲可以同心靈溝通；而劍我都好鍾意，風格同力量要平衡， 同跳舞好似，我會將耍劍比喻成水，剛柔並濟，好有美態。」

Natalie動靜皆宜，自小品學兼優，最後兩年中學生涯，更獲取學校全額獎學金，但她為追求自己的演藝夢，不惜放棄獎學金而投身幕前。問她會否感到可惜？「完全冇後悔！做演員係我人生裏面其中一個最正確嘅決定，嗰陣有考慮獎學金呢方面，不過我同爸爸、媽咪都覺得，拍戲機會真係好難得，就做咗呢個決定，向前行，唔會後悔同遺憾。入咗行後得到好多，成個生活變咗，係好多人一生都未必會經歷到嘅嘢，我認識到好好嘅人、去到好好嘅地方，接受好多唔同嘅挑戰，真係成長咗好多。」