唔知大家對宮崎有咩印象呢?年頭嘅時候就有一班學生去咗宮崎交流團，趁依家人人都要留係屋企之際，不如睇下佢地去咗咩地方，跟住佢地嘅腳步重新認識一下宮崎啦！
image via 日本の歴史ガイド
第一站同學仔就去咗綾町，綾町距離鹿兒島機場大約一個鐘車程，位於宮崎縣中南部內陸地區嘅一個小山坡上，沿途風景慢慢變成農村風光，係自駕遊嘅好去處。綾町建於日本南北朝時代，公元1331年由足利尊氏嘅家臣細川小四郎義門負責建成。後來細川小四郎義門個仔——細川義遠係綾町嘅山上面起咗個要塞城堡，由於佢自稱為綾，所以呢個城堡又得名為綾城，亦係同學仔今次主要參觀嘅目的地。
睇下同學仔玩得幾開心?
不過，由於江戶幕府於1615年實施一國一城令，綾城被廢除。跟據綾城門口石碑紀錄，城內嘅天守閣係喺1985年復建。除左呢塊石碑外，仲有一塊由當時嘅明仁天皇修平成十六年四月二十六日臨幸綾城嘅紀念碑。
天守閣隱藏於森林之中，雖然稱唔上係大城堡，但建物保存良好，天氣好嘅時候，屋瓦被陽光照得閃閃發亮，當年戰國豪族風氣不減，可以想像當年綾氏有幾意氣風發。
呢度亦係一個博物館，保存住各樣當時城主同家臣嘅場景，並展現當時各種衣服、武器以及生活用品。
值得一提嘅係，天守閣嘅支柱係由有三百年歷史嘅栂樹(鐵杉樹、松科) 嘅樹幹建成，身處其中更感受到佢嘅古典美。
綾城三樓係瞭望台，可居高臨下360度俯瞰綾町的村落與林相，有一種大地在我腳下嘅感覺。
參觀完城樓，不妨到附近嘅工房學下師，體驗織布同製作陶瓷工藝品，唔少日本學子對坐在織布機前學習織布都覺得好好奇，好受歡迎架！如果唔想動手，都可以購買精緻嘅木工、竹製、陶器、染織等工藝品，全部都係手工製作，都係一個好好嘅紀念。
*行程由CALC HSUHK提供
小編仲發現咗個打卡位，同古典又莊嚴嘅綾城相比又係令一種氣質：
Image via ヨネさん（男性/30代）
就係呢個通往停車場嘅吊橋，一企上去隨便影都係一張ＩＧ美照，打卡控可以自己留意一下！
綾城
地址：〒880-1302 宮崎県東諸県郡綾町大字北俣1012
電話：0985-77-1223
開放時間：
公開：4月～9月 9:00～17:30
公開：10月～3月 9:00～17:00
留言 0