《鬼同你住》網傳三大凶宅睇樓怪事　有屋苑猛到非凶宅都一樣「熱鬧」

人人都知樓價貴，卻人人都想上車，如果話你知有個激安筍盤，不過係凶宅，你制唔制？本周新片《鬼同你住》透過幾個靈異故事道出香港地，每況愈下的土地問題，當中地產經紀為了佣金不惜水啲客睇凶宅的故事，非常貼近大家生活，其實香港不少屋苑都有靈異都市傳說，只是鬼故恐怖極，都唔夠飆升的樓價恐怖。

睇樓撞正冥婚

在台灣一個論壇曾經流傳過，香港一對新婚夫婦的睇樓鬼故，事件大約發生在2000年，當日因為兩公婆都要返工，於是約了晚上睇樓，連同經紀共三人到場後如常撳鐘敲門後入屋，一開門竟發現單位滿滿都是穿西裝或晚裝的人，當中有一對新人更正在敬茶，不過畫面卻是全黑色，他們第一時間以為入錯屋，連聲道歉之後出門，惟獨覺得屋企眾人面無表情的狀態有點奇怪，之後經紀打電話返公司詢問上司，大約5分鐘上司亦到場，一行四人再訪同一單位，怎料一開燈之後，單位內陳設完全一樣，惟獨不見剛才大堆頭的「人」影，即時聯想到剛才可能目睹了冥婚現場，火速離開單位。

土瓜灣邪爆鮮綠色單位

樓齡偏高的土瓜灣區亦出產很多睇樓鬼故，曾有網民在網上分享撞鬼經歷，事緣事主與女友在尖沙咀返工，一心想找租金平又就腳的租盤，一晚收工後到一幢樓齡40年以上的舊樓睇樓，雖然大廈外牆陳舊，但勝在內部夠光猛，事主憶述當晚睇樓單位的大門是罕見的鮮綠色，入屋一開燈後眼前好像蒙了一層薄霧，牆壁竟是與大門一樣的鮮綠色，面對大門的位置一字排開放了四張木櫈，感覺不太舒服的事主已一心離開，一轉頭才發現經紀原來一直沒有入屋，一直站在單位外側邊位置，疑似想避開不望入門內，而他回頭最後一刻更望到木櫈上坐了一家四口，嚇到事主和經紀都呆了，連燈都未熄就馬上衝去搭𨋢，最怪異的是，後來事想再想找該經紀，卻怎樣也找不到他的電話號碼，連最初聯聯絡地產鋪的位置都記不起來。

西環誤撞金髮鬼

靈異故事好均真，無論舊樓定豪宅都會有，西環有個豪宅屋苑，多個單位發生住戶燒炭、跳樓等案件，但至今屋苑依然好多人爭相入住，當中不乏商界、名流，有曾負責該盤的經紀在網上透露幾年前曾帶一名人的另一半睇樓，因為對方稱是一個人自住，疑似關係出現問題，避免被影到就約了晚上11點睇樓，關於當晚睇的單位，這位經紀誓言旦旦事先查過不是凶宅，但當晚睇樓行到主人房，突然見到房內大床上坐了一個金色短髮的外國男人，個客即時大叫跑走，經紀最初只是不知房中有人，以為不小心踢爆住客的私癮。第二日返工就打電話詢問業主為何房中會有人，卻被告知該單位連家私也沒有，經紀本來不相信，特別再前往單位，發現果真如業主所言，主人房內空無一物，後來經紀再翻查紀錄，原來該單位的確不是凶宅，但樓下的單位卻曾有外國人燒炭自殺。