謝賢馮寶寶50年後重逢！《殺出個黃昏》由父女變為生死之交

由林家棟監製、謝賢、馮寶寶、林雪演出的黑色喜劇《殺出個黃昏》終於開拍。而憑《打擂台》令人關注的賈曉晨（JJ）更是10年後歸隊再與林家棟合作，日前於油麻地一間懷舊歌廳進行拍攝，吸引不少途人圍觀。

電影主要圍繞四哥周旋於馮寶寶、林雪兩個摯友之間，三人尋找存在價值。四哥近年演出多以客串為主，今次再次以男主角身份奉獻給《殺出個黃昏》，他大讚此片選角非常出色：「拍戲就多，同咁多𡃁仔拍都係第一次，家棟又話要我變，又唔俾我側起個頭，咪睇佢有咩把砲囉！今次同阿雪演對手戲，叫佢放我一馬啦！」談到跟老友馮寶寶再聚頭，四哥笑指猶如時光倒流：「Bobo喺我眼中永遠係一個小妹妹。雖然係舊拍檔，但係我期望有新火花，等我帶佢搵番啲青春。」四哥更表示：「其實我仲有一個任務，就係帶啲新人。」

馮寶寶和謝賢在1960年的《連理枝》中飾演父女，今次兩人久別重逢，首日開工拍攝已經遇上片中「耆英天使」出動的場面，三人見面即來個熱情擁抱，更不時互相鼓勵，BoBo姐表示：「我聽到係同四哥合作，咪喺馬拉即刻飛返嚟囉，佢真係似我大哥哥㗎，同四哥真係相逢恨晚。」而一向貪玩的林雪於片場表現輕鬆：「我都係嚟跟四哥同Bobo姐學嘢，不過今次好難得我有條感情線，希望俾觀眾睇吓咩叫大叔的浪漫。」

除了融洽相處的場口，同樣也要拍三人壓力爆煲的場口，監製坦言甚具壓力。家棟表示：「每個角色背後都有自己嘅包伏，佢哋面對嘅挑戰好大，所以都要慢慢調整。幸好今次四哥、Bobo姐同阿雪好有突破，好主動提出想法，我覺得係新人學嘢嘅好機會。」

《殺出個黃昏》故事講述謝賢、馮寶寶、林雪三人50年代曾是聞風喪膽的殺手組織，無奈時代蛻變，三人卻不敵年紀漸長，從此各自過著平凡的生活。當步入黃昏之年，被社會標籤為負資產，憑藉電台點唱，一首青春之歌，便是三人重聚之時⋯⋯

撰文：機