【潮界代表】為陳冠希平反！ EDC潮人潮事知多啲

香港潮界嘅代表性人物，十幾年前由陳冠希同余文樂兩個人，鬥自家牌子、鬥女同鬥車（笑），十幾年後嘅今日都仲係佢哋兩個，但兩人之間嘅距離早就變成「你冇得同我架FC鬥」！雖然近期陳冠希頻頻「炒車」，一時似阿伯、一時似民工，最新演繹Polo Ralph Lauren聯名更被恥笑似「壽衣」，究竟係過度放大定EDC光芒不再？今次就同大家一齊盤點近年陳冠希嘅潮人潮事！

撰文: K.P.｜圖片來源：陳冠希IG、網上圖片、CLOT｜編輯：海月

1.CLOT 15週年進軍紐約、巴黎時裝週

近年CLOT喺香港召號力大不如前，過往潮人喺銅鑼灣JUICE排隊搶潮物嘅景象不再，原因係大家都覺得陳冠希擁抱「13億市場」！的確佢近年嘅重心都擺喺內地（事業方面）同美國（家庭方面），但EDC係咪一個完全忘本嘅人？未必！最少喺CLOT嘅系列有唔少蛛絲馬跡！

2018年，CLOT創立15週年，先後受邀請喺紐約時裝週同巴黎展出系列。前者嘅Fashion Show，除咗有一般Model外，更搵咗兩位特別嘉賓：MC仁同龍哥；而其後嘅巴黎時裝週，EDC更透過港式風格嘅佈置，以女人街Style去展示CLOT嘅2019春夏系列。

想當年CLOT一出新系列，銅鑼灣JUICE一定排隊排到癲！

CLOT進軍New York Fashion Week呢件事，其實某程度上係香港潮界嘅里程碑。

客串Model嘅「龍哥」，其實係由細照顧EDC到大嘅私人司機兼助理，更係多年前陳冠希「阿伯Meme圖」嘅主人翁！

將女人街嘅佈置重現於巴黎時裝週

2.Nike Future Sport Forum與藤原浩、Travis Scott等人組成「潮流界Avengers」

喺2020年疫情未大規模爆發前，Nike破天荒喺New York Fashion Week舉辦咗個名為「Future Sport Forum」，呢次活動除咗展出2020年夏季各大Nike自家系列同聯名企劃，另一重頭戲就落喺一眾出席活動嘅V.V.I.P.嘉賓身上。包括藤原浩、Travis Scott、G-Dragon、Virgil Abloh、Tom Sachs、Yoon Ahn、Matthew Williams、Martine Rose、Drake等人，而呢班同Nike有密切合作關係嘅人物，仲包括咗陳冠希，事後嘅大合照喺網上瘋傳，更被譽為「潮流界Avengers」，亦證明佢係同呢班國際級潮流Icon平起平坐！

由Nike舉辦嘅「Future Sport Forum」活動

堪稱「潮流界Avengers」嘅大合照，亦足可見陳冠希嘅國際視野，令佢喺潮界愈見舉足輕重！

3.「攝影師」變潮爸

眾所周知陳冠希曾經係一名「攝影師」，但自從結婚後加上女兒出世早就變成住家男。曾經玩世不恭嘅EDC昇格成潮爸，喺美國LA嘅私人大宅，全屋每個角落更放滿EDC私人珍藏嘅潮物同藝術品，任由女兒隨便玩隨便畫，明顯想耳濡目染由細培養出佢嘅藝術天份，EDC指定接班人，指日可待。

後生嘅EDC經常會Show Off佢屋企擺放嘅潮物，例如大量嘅BE@RBRICK同KAWS畫作。

呢家一屋潮物任愛女Alaia玩

亦曾帶埋Alaia影雜誌刊面，近期EDC同Polo Ralph Lauren聯名，而女兒更成為童裝代言人。

4.紅褲Look似足《拳皇98》怒加

喺今次「壽衣」事件前，陳冠希早喺舊年經已炒咗次時裝車禍，話說除咗Polo Ralph Lauren之外，EDC亦穫法國高級時裝GIVENCHY青睞，為同樣都係潮人出身嘅GIVENCHY新任創意總監Matthew Williams撐場，以Skinhead髮型演繹GIVENCHY 2021春夏季服飾。但唔單止造型，可能係連Pose都太前衛，普遍網民都表示EDC一身裝扮猶如藍領民工，甚至有人認為呢個紅褲Look，似足《拳皇98》中嘅Final Boss：怒加！