希望丈夫早日離世？婚後不滿累積易患上「夫源病」！

「婚姻是愛情的墳墓」呢一句就聽得多啦，但點都估唔到太太們對另一半嘅不滿感覺如此強烈！日本有調查指出，近半受訪嘅妻子表示希望另一半可以早日離開人世，當地學者就提出咗「夫源病」，去形容妻子因無法忍受另一半嘅行為，而出現包括心悸、頭痛、頭暈等等嘅症狀。

按日本大阪大學石藏文信教授嘅調查結果顯示，五成六嘅受訪人妻喺結婚5年內，就會開始討厭丈夫，有四分之一更早喺1年內就開始嫌棄另一半。六成人妻更指自己係因經濟壓力緣故而無法喺短期內離婚，最令人震驚嘅係有55%人妻想丈夫早啲過身！

石藏文信教授就提出咗「夫源病」，意思係妻子因為丈夫嘅各種行為而出現神經性疾病，唔好以為只係心理上出現嫌棄感覺，身體上亦會出現不適症狀，更會出現抑鬱嘅現象，所以教授認為呢種情況已經演變成社會問題。