尋找跑會的故事 #28 | 大埔民間體育會．去過嘅都會想跟佢哋跑步 | Fitz

唔知由幾時開始，逢星期二晚嘅大埔運動場都會有百九幾二百人跑步，十有八九著住「大埔民間體育會」嘅跑衫，曾以為佢哋逢星期二包場玩晒，閒人免進 !

「大埔民間體育會」最初由電視主播柳俊江及藝人保錡所創立，前者仙遊後，曾一度迷失方向嘅保錡幸得一眾Core Member支持，終決定繼續下去，由最初只以大王爺廟為起點嘅街跑活動開始，劇情瞬間發展至當下逢週二大埔運動場萬人空巷式嘅跑步盛況，誠意打動好明星效應也好，一個非教班式嘅地區性自發跑會能有如此叫座力，唯佢獨專，暫時 !

雖然係免費兼非教班式跑會，但其系統性及架構卻仔細得令人心服口服。Elite 組、五分披組、六分披組、七分披組，甚至開開心心Fun Run組，全部有專屬 core member 帶住跑。嫌倉鼠跑枯燥又乏味 ? 仲有街跑組你揀，一樣有pacer，死未 ?! 漁翁撒網式嘅全方位細心安排，任君選擇。任何取向嘅跑友，總會搵到你所需，重中之重係，無人會迫力跑咩組，一句講晒 – 根本無人care 你快定慢，咁大陣仗咁大棚人，重點得一個 - 「跑吓啦」，一班人係咪真係會跑遠啲 ? 唔知，但肯定會開心啲好玩啲。

[View this post on Instagram
](https://www.instagram.com/reel/DCGQ5lQBkGv/?utm_source=ig_embed&utm_campaign=loading)
A post shared by Why Not Run?! | 跑步 | 跑會 | 飲跑食醉 (@whynot.run)

唔少人對藝人跑步都帶有偏見，跑幾k / post 相 / 感性嘅抒發……呃like擦流量搏曝光。

對，寫「大埔民間體育會」避不了要談及保錡。誠然，佢幕前嘅種種以至佢所屬嘅男團，抱歉，不大留意亦不感興趣，為何被戲謔為跑步小丑，沒有深究。今時今日嘅網上世界，要包裝一個人或踩低一個人太易，易到真偽不再係重點，花生放題才是正道。親身接觸過嘅保錡，竟不是螢幕上所認知嘅口沒遮攔；亦沒那種廉價MK味，眼見為實嘅係，因為佢 (好大程度上係因為佢，我認為) 每個週二晚總有接近二百跑友風雨不改開懷地跑，而且發展至今已不只是大埔民間專屬，更有垮區跑友到嚟參與，單憑呢份號召力及親和力，保錡無功都有勞卦 ?! 況且，相信只有跑友會明兼一眼睇得穿 – 扮跑扮鍾意跑其實唔頂得幾耐，好快露饀兼消失，然而保錡今天仍在跑。