溫拿告別 紅館70場紀錄 阿倫拒拍電影版 │封面故事

溫拿成軍50年，年紀最小阿B亦已「登七」，但溫拿五虎仍然充滿活力，五人一起的時候，必定笑聲不斷，陳友說：「『登七』之嘛，我哋仲壯壯健健，好正能量喎！今日唔知聽日事，有得唱就唱囉！」
上次溫拿開騷，已是16年《溫拿NEVER SAY GOODBYE演唱會》，今年8月6日，他們第九次於紅館開騷，這次名為《Farewell With Love》，顧名思義，這次是溫拿的告別派對，阿倫一臉正經說：「容許我代表大家講少少說話，我想嚴肅少少，我哋五個都是香港仔，生於斯、長於斯，但凡事都有一個終結，不過，今次是哀而不傷，雖然帶着無奈，同時亦都帶着開心的心情，趁住大家仍然在一個好狀態，講真，我哋都要量力而為。」

今年是溫拿五十周年，他們選擇在今年八月的演唱會向歌迷告別，本月底歌迷準備撲飛了。

溫拿除了是華語樂壇最長壽樂隊，亦是在紅館開騷的第一個樂隊，同時保持最多場數紀錄的樂隊，阿倫說：「真係唔記得開過幾多場？經常同自己嗰啲演唱會混淆，70場？」阿B說：「係呀！有紀錄，我記得啲細路捐台底捐到大，女兒鍾懿，由手抱到現在(18歲)，雖然去了倫敦讀書，但今次都會回來跟歌迷say hi。」

上一次在紅館開騷已是16年《溫拿NEVER SAY GOODBYE演唱會》

問他們要如何安撫歌迷？阿倫說：「唔使，大家有什麼感情、有什麼感覺，就盡情抒發出來。」阿健說：「一定有感覺，但我覺得，台上應該比台下大，尤其是阿B。」

已定居澳洲的阿強，回港為演唱會準備，陳友想起以前阿強有個花名叫「豬頭強」，現在變成「白頭強」，阿倫就大讚有型，阿強說：「唔知係咪掛住香港，掛到頭都白晒。」講起髮型，他們又笑阿健，阿健死撐，「你哋試下五十年髮型都不變啦！我就做得到，這個髮型背後有個金句，是創業難、守業更難。」說罷全場大笑，阿B說：「你以前話要用何守信嗰隻噴髮膠嘛！」阿健又說：「一些經典金曲的歌手，唱完歌，永遠不敢鞠躬，因為驚見到光頂，但我哋呢班人，唱完歌仲可以名正言順地鞠躬。」阿倫在旁爆笑：「我幫你㩒住個頂先。」

溫拿難得齊人，即場jam了兩首金曲《Sha La La La》和《千載不變》，他們說《千載不變》是最能代表溫拿，「我們五個人都會揀這首歌，講真，要keep住五十年的友誼，最緊要係唔小器！」邊個最小器？陳友先舉手，阿B說：「你驚個個都指你。」阿健說：「好似今次訪問咁，你睇個set up就知道邊個最想出位，我未見過套鼓會擺得前過歌手，Beatles都唔會啦！」阿倫幫口：「陳友今次已經好好，佢願意收斂，已經冇出盡力打，真係遷就咗㗎喇。」連甚少出聲的阿強都話：「其實夾Band最重要係冇隔夜仇！」

溫拿五十年來為香港人帶來不少歡樂，他們說溫拿精神不會因告別而消失。

陳友早年執導電影《兄弟班》，用溫拿年輕時的故事作藍本，會否趁今次50周年的告別騷，再拍一套自傳式電影？阿倫聞言即耍手擰頭，「唔會，幾十歲仲搞呢啲，好攰，如果真係要拍，只可以拍電視劇，我諗要播二十個星期先得，要將我們的過程很詳細和很真實帶出來，如果要遷就劇情、又要遷就觀眾或者主角，咁好多東西就會失真。」阿B亦同意：「五十年好難在一齣兩小時的電影做完。」

至於接班人，五位都沒有「點燈」，他們只作出寄語，阿倫說：「我們見很多，只能共患難，不能共富貴，如果能夠珍惜一段友誼，大家又做得出一些成績，其實大家要放得開，不要計較。」阿B說：「夾Band最重要是夾人。」阿健一直有留意現今的樂壇，「有些樂隊，可能裏面有一兩個特別標青，好難，好易散band，五個人盡量平均，好似執藥咁，阿B和阿倫早期的歌都係我揀，譬如一些搖滾的就適合阿B、要抒情Love song就係阿倫。」阿倫忍唔住口：「多謝晒！不過人哋問接班人呀？其實阿健呢，會keep住同很多新樂隊夾嘅，介紹好多新人，亦會俾很多意見。」阿健續說：「我會將一些歌帶給新樂隊，現在香港是很多band，我物色緊好多，但最重要是識創作。」

溫拿今年會推出六首新歌，第一首是阿B和阿倫合力創作的《由始至今》。

溫拿的新歌《由始至今》，由阿倫和阿B共同作曲，阿倫更親自填詞，他說：「如果要搵人填這首歌，真係唔知邊個熟得過我哋。」阿倫把有關溫拿的作品都放入歌曲，有《溫拿狂想曲》、《Sha La La La》、《追趕跑跳碰》、《千載不變》等等，陳友說新歌就好似一份聲明，「講出溫拿的整個過程，和面對未來的感受，拍MV時睇返五十年前張相，真係唔經唔覺就五十年！」

溫拿在73年登上《明周》封面，這個封面同樣有五十年歷史。

阿B呼籲歌迷以懷舊打扮到演唱會欣賞