思家大戰︱《東張西望》主持陶大宇上身跳水撥舞搞氣氛

李思捷主持無綫遊戲節目《思家大戰》明晚（年廿八）第20集，嘉賓有區永權率領、由《東張西望》主持組成的「60886600」隊，以及家庭觀眾代表「老表你好正」隊。「60886600」隊成員有陳庭欣、容羨媛、吳幸美及何沛珈。配合年廿八播出，主持及嘉賓都穿得紅噹噹非常應節；李思捷又與《東張西望》主持唱賀年歌，期間大跳近期熱爆的陶大宇水撥式舞姿。

今集問題是「講一樣女人着得愈耐就愈唔舒服嘅嘢」，當中容羨媛玩到戙高腳擺上枱回答問題，李思捷被她嚇窒說：「估唔到容容係咁樣！」之後李思捷覺得何沛珈的回答「難以置信」，豪言不信她會答中，說如答對請她食飯。結果何沛珈真的回答正確，李思捷隨即扮嬲飛紙仔，埸面搞笑。

《東張》主持有口才同急才，以「轉數快」出名的李思捷繼被何沛珈「技術式擊倒」後，區永權亦上演「逆襲記」搶「飯碗」；而在《東張》經常做「白老鼠」的吳幸美，在節目表現出色連番答中問題。

（即時娛樂）