黃腰胡蜂係本地數一數二的惡蜂，攻擊力強。我自己都瀨過三次嘢，每次都有人受傷，今次最甘（編按：筆者曾於2021年在植樹林工作時被惡蜂攻擊，被蜂螫11處，半身麻痹，一度被困，與惡蜂群相處超過兩小時，下文將長述經歷及事後檢討），所以唔好以為上得山多就唔會出事，只能夠話，每次經驗都係一個教訓，最緊要學精，盡力避免下一次。
有朋友想我總結經驗，都好，我有好多搞野外活動同喺野外工作嘅朋友，加埋有好多前輩畀我嘅資訊，歸納如下俾大家參考：
1.預防永遠最重要
先了解惡蜂嘅生長環境，我遇過幾次惡蜂，蜂巢都係築响長草叢嘅地上。蜂巢可以喺樹林內，亦可以喺空曠長草叢，亦可能喺甚少人行嘅荒徑邊，同大家所認知嘅「蜂巢掛在樹上」係完全唔同狀態，即係話行過都幾乎睇唔到地上有蜂巢，好容易誤踩。
行山嘅話，只能勸你唔好爆林，同埋唔好亂爆草叢開捷徑，同埋戴帽有着數。
野外工作嘅話，要着好防蜂帽同厚衣等保護裝備。今次我係有啲大意，因為第一個工作天
2.過敏反應最危險
點解咁驚俾惡蜂螫？係因為針嘅毒素有機會引起過敏反應，有啲人會即刻腫到好厲害，甚至呼吸道都完全腫起，咁就會窒息，要盡快去醫院打針，否則會有性命危險，所以唔係你忍唔忍到痛嘅問題，總之盡量唔好俾佢針太多，同埋如果傷者有敏感症狀，例如呼吸困難，就要盡快送佢落山。
3.踩中蜂巢點應變
惡蜂動作好快，會即刻空群而出嚟攻擊你。第一時間要保護個頭！前輩話，佢哋會追趕郁嘅東西，同埋黑色嘅嘢，即係最突出嘅目標就係你個頭。今次我都係，佢哋瞬間即刻瘋狂追擊我個頭同耳仔，我頂帽又响混亂中跌咗，所以頭係我嘅重災區。而我被針後即刻感受到麻痺同劇痛，亦都影響咗我逃走嘅能力。
之前我被惡蜂攻擊，我試過即刻痞低，唔好郁，等佢哋冷靜，然後慢慢爬離現場。之前係work嘅，但今次唔得。原來今次我伏低嘅位置距離個巢太近，胡蜂好有地盤性，某一範圍內生人勿近，所以我當時除咗扮死等救援，都無乜計。
自我檢討後，我建議自己下次細心留意行走路線，如果又係荒地上踩中， 就應該用九秒九速度即刻向回頭走，或向「確定不是蜂巢所處嘅地方」逃走起碼5米外，先踎低停止晃動，等佢哋回巢。如果喺明確山徑上撞到就相對簡單，你沿路向前或者回頭衝多一段路，離開咗佢嘅地盤範圍，就相對安全。
講就好理想，仲要睇吓你旁邊有乜人，同埋係乜嘢地形同路況，我嘅建議就當參考吓，到時執生啦。
4.救援人員點救人
講一講今次救援人員點救我離開蜂巢邊，他日如果有人喺蜂巢邊被困或者暈咗，都可以參考咁做。救援人員先着好保護衣同蜂帽，三人小隊，一個負責噴殺蟲水，減緩惡蜂嘅能力，另外兩個就即刻用一張氈冚住我，然後夾我走（當時我半身麻痹，靠佢哋扶我走），跟住四人一齊逃離現場。
係，惡蜂會繼續追出嚟嘅。所以要救人，救援嘅人必須着好保護裝備。今次之後我即刻返去檢討自己嘅野外工作包包，以後點都要放返兩三套保護衣同Cover，可以立即自救，因為唔係每次都可以等到官方救援人員嚟到。如果傷者有敏感症狀，任何人都應該事不宜遲，夾手夾腳抬傷者離開。
以上分享，我冇特別再上網睇資料，因為有啲心理陰影，暫時唔想再睇到蜂照，會反胃，所以有啲技術名詞稍為略過，純粹個人慘痛教訓後之檢討。
仲想講嘅係，個個前輩都話，中過係唔會有抗體，而係會响身體累積，再中嘅反應可能好大。其實園藝和野外工作者每日都要面對呢啲風險，我真心佩服，我有識園藝朋友被針到冇晒quota（再針就過敏），佢哋工作真心辛苦，但工資廉價，係一個長期被忽略但又好值得尊敬嘅行業。
撰文：鄭茹蕙
註1. 原文撰於2021年11月，轉載於2023年9月22日。
註2. 感謝David Shek借用有關相片。
▼ Follow 風火山林
Website：https://hikingwindfire.com/
Facebook：https://www.facebook.com/hikingwindfire
Instagram：https://www.instagram.com/hikingwindfire.hk/